Surxondaryoda g‘alladan bo‘shagan yerlarni yoqib yuborganlar javobgarlikka tortildi, deb xabar bermoqda Ekologiya, atrof-muhitni muhofaza qilish va iqlim o‘zgarishi vazirligi Surxondaryo viloyati boshqarmasi matbuot xizmati.
Ayni kunlarda g‘alla o‘rim-yig‘imi jadal ketmoqda. O‘z navbatida g‘alla hosilidan bo‘shagan maydonlardan samarali foydalanish o‘rniga bug‘doy poyalari, somon va yovvoyi o‘simliklar qoldiqlarini yoqib yuborish holatlari uchrab turibdi.
Surxondaryo viloyati Ekologiya boshqarmasi, Jarqo‘rg‘on tuman bo‘limi davlat inspektorlari tomonidan o‘tkazilgan tezkor reyd tadbirlari davomida Jarqo‘rg‘on tumani “Neftchilar” mahallasida joylashgan “Elomon Murodovich” fermer xo‘jaligiga qarashli g‘alladan bo‘shagan 4 gektar yer maydoni takroriy ekin ekish maqsadida yoqib yuborilgani aniqlangan. Ushbu holat bilan tabiatga 3 million 191 ming 514 so‘m zarar yetkazilgan.
Tumanning “Bobotog‘” mahallasida joylashgan “Oltin Sharq maskani” fermer xo‘jaligida ham g‘alladan bo‘shagan 2 gektar yer maydoni takroriy ekin ekish maqsadida yoqib yuborilgan. Ushbu holat bilan tabiatga 1 million 867 ming 840 so‘m zarar yetkazilgan.
Navbatdagi reyd tadbirlari davomida tumanning “Yangi turmush“ mahallasida joylashgan “O‘zbekxon UMUTI“ fermer xo‘jaligiga qarashli, g‘alladan bo‘shagan, 4 gektar yer maydonini takroriy ekin ekish maqsadida shu mahallada yashovchi fuqaro O‘.Z. tomonidan yoqib yuborilgani aniqlangan. Bu holat bilan tabiatga 6 million 580 ming 383 so‘m zarar yetkazilgan
Reyd tadbirlari davomida ana shunday holatlarning navbatdagisi tumanning “Oqtepa” mahallasida joylashgan “Oqtepalik Suhrob” fermer xo‘jaligida kuzatilgan. Fermer xo‘jaligiga qarashli g‘alladan bo‘shagan 30 sotix yer maydoniga takroriy ekin ekish maqsadida shu mahallada yashovchi J.T. tomonidan yoqib yuborilgani aniqlangan. Bu holat bilan tabiatga 349 ming 857 so‘m zarar yetkazilgan.
Yuqoridagi holatlar yuzasidan fermer xo‘jaligi rahbarlari va aybdor fuqarolarga nisbatan Maʼmuriy javobgarlik to‘g‘risidagi kodeksning 88-moddasi (atmosfera havosini muhofaza qilish talablariga rioya qilmaslik) 3-qismiga asosan maʼmuriy bayonnoma rasmiylashtirilgan.
Ushbu moddaga ko‘ra, dala va aholi punktlarida ang‘iz, xazon va shox-shabbalarni yoki o‘simliklarning boshqa qoldiqlarini yoqib yuborish, atmosfera havosini zararli moddalar bilan ifloslantirishga olib kelsa, fuqarolarga BHMning uch baravaridan 5 baravarigacha, mansabdorlarga esa 5 baravaridan 10 baravarigacha miqdorda jarima solishga sabab bo‘ladi.
Viloyat bo‘ylab nazorat tadbirlari davom etmoqda.
Izoh (0)