O‘zbekiston prezidenti saylovida muddatidan oldin ovoz berish 28-iyundan boshlanib, 5 iyulda yakunlanadi. Bu haqda Markaziy saylov komissiyasiga tayanib “Gazeta.uz” xabar berdi.
Qayd etilishicha, 20-iyun kuni komissiya majlisida saylovchilarning muddatidan oldin ovoz berishini tashkil etish, prezident saylovini o‘tkazish davrida jamoat tartibini saqlash va jamoat xavfsizligini ta’minlash, saylovga tayyorgarlik ko‘rish davrida Markaziy saylov komissiyasiga kelib tushgan murojaatlar hamda prezident saylovida xalqaro tashkilotlardan qatnashadigan kuzatuvchilar va OAV vakillarini akkreditatsiya qilishga doir masalalar ko‘rib chiqilgan.
Majlisda Saylov kodeksiga binoan muddatidan oldin O‘zbekiston prezidenti saylovi kuni o‘z yashash joyida bo‘lish imkoniyatiga ega bo‘lmagan saylovchilar uchun saylov uchastkalarida muddatidan oldin ovoz berish o‘tkazilishi yuzasidan qaror qabul qilingan.
Unga ko‘ra, muddatidan oldin ovoz berish 28-iyun kuni boshlanib, 5-iyul kuni yakunlanishi belgilangan. Saylov uchastkasida muddatidan oldin ovoz berish vaqti ish kunlari soat 9:00 dan soat 18:00 ga qadar, dam olish va bayram kunlari soat 11:00 dan soat 17:00 ga qadar davom etishi qayd etib o‘tilgan.
Muddatidan ilgari O‘zbekiston prezidenti saylovida xorijiy davlatlar va xalqaro tashkilotdan qatnashadigan kuzatuvchilarni akkreditatsiya qilish to‘g‘risidagi MSKning qarori bilan 39 nafar kuzatuvchi akkreditatsiyadan o‘tkazilgan.
Izoh (0)