Futbol bo‘yicha O‘zbekiston milliy terma jamoasi 20-iyun, seshanba kuni CAFA Nations Cup—2023 finali doirasida Eronga qarshi bahs olib boradi. Mazkur o‘yin oldidan “Daryo” jamoalarning o‘zaro qarama-qarshiligi tarixini yodga oladi.
Prevyu
Bu jamoalar o‘rtasidagi 12-o‘yin bo‘ladi. Bunga qadar bo‘lgan 11 o‘yinning 9 tasi Eron foydasiga hal bo‘lgan, bitta o‘yinda O‘zbekiston g‘alaba qozongan va yana bir o‘yin durang bilan tugagan.
- Eng ko‘p qayd etilgan hisob — 1:0 / 0:1
- Eng yirik hisob — 0:4
- To‘purar — Ali Dayi (3 ta gol)
O‘zaro o‘yinlar
1998-yil. O‘zbekiston — Eron 0:4
Jamoalarning ilk to‘qnashuvi 1998-yilgi Osiyo o‘yinlari doirasida kechgan. Chorak finalda amaldagi chempion hisoblangan O‘zbekiston forslardan qaqshatqich mag‘lubiyatni qabul qilib oladi. Avvaliga Ali Movsavi birinchi bo‘limda hisobni ochadi. Uchrashuvning so‘nggi o‘n daqiqaligida Eron afsonasi Ali Dayi ketma-ket uch bor Pavel Bugalo darvozasini ishg‘ol qiladi.
Bu jamoalar qarama-qarshiligidagi eng sermahsul o‘yin va eng yirik hisob bo‘lib qolmoqda.
2007-yil. Eron — O‘zbekiston 2:1
Malayziya maydonlarida o‘tgan 2007-yilgi Osiyo Kubogi guruh bosqichida O‘zbekiston dastlabki turda Eronga 1:2 hisobida yutqazadi. Avvaliga O‘zbekiston Rahmon Rizoining avtogoli evaziga oldinga o‘tib oladi, biroq ikkinchi bo‘limda forslar Said Jalol Hussayni va Javad Kazemianning gollari evaziga g‘alabani ilib ketadi.
Keyinroq O‘zbekiston terma jamoasi Malayziya va Xitoyni yirik hisobda yutib, guruhdan 2-o‘rin bilan chiqadi. Ammo chorak finalda Saudiya Arabistoniga yutqazib qo‘yadi.
2009-yil. O‘zbekiston — Eron 0:0
Toshkentda o‘tgan o‘rtoqlik o‘yinida nursiz durang qayd etiladi. Bu o‘zaro o‘yinlar tarixida gol urilmagan yagona uchrashuv bo‘lib turibdi.
2012-yil. O‘zbekiston — Eron 0:1
Futbol bo‘yicha 2014-yilgi Jahon Chempionatiga hal qiluvchi saralash bosqichining 1-turida O‘zbekiston terma jamoasi Eronni qabul qiladi. O‘yin davomida maydon egalari katta ustunlikka ega bo‘ladi va vaziyatni nazorat qiladi. Odil Ahmedov tomonidan urilgan gol Yuichi Nishimura boshchiligidagi hakamlar tomonidan inobatga olinmaydi.
Hakam tomonidan qo‘shib berilgan vaqtning 3-daqiqasida Muhammad Rizo Halatbori forslarning kam sonli hujumlaridan birini golga aylantiradi. Ushbu alamli mag‘lubiyatdan keyin Vadim Abramov O‘zbekiston terma jamoasi bosh murabbiyligidan olinadi va uning o‘rnini Mirjalol Qosimov egallaydi.
2012-yil. Eron — O‘zbekiston 0:1
Oradan besh oy o‘tib “Ozodi” stadionida javob o‘yini bo‘lib o‘tadi. Bu safar bahs Toshkentdagi o‘yinning deyarli teskari ssenariysi asosida o‘tadi. O‘zbekistonliklar Ulug‘bek Baqoyevning 71-daqiqadagi goli evaziga g‘alabani ilib ketadi.
Bu hozircha O‘zbekistonning Eron ustidan qozongan yagona g‘alabasi bo‘lib turibdi.
2015-yil. O‘zbekiston — Eron 0:1
Jamoalar 2015-yilning noyabrida Toshkentdagi “Bunyodkor” stadionida o‘rtoqlik o‘yini o‘tkazadi. Mehdi Torabi tomonidan urilgan yagona gol forslarga g‘alaba keltiradi.
2016-yil. O‘zbekiston — Eron 0:1
2018-yilgi Jahon Chempionati 3-saralash bosqichida jamoalar yana bir guruhdan joy oladi. Bu safar ham Eron minimal hisobdagi g‘alabani qo‘lga kiritadi. Said Jalol Hussayni — g‘alaba goli muallifi.
2017-yil. Eron — O‘zbekiston 2:0
Ikkinchi davradagi o‘yinda forslar O‘zbekistonga imkoniyat qoldirmaydi. Sardor Azmun va Mehdi Taremining gollari Eronga g‘alaba keltiradi. Bu g‘alaba orqali Karlush Keyrush shogirdlari mundial yo‘llanmasiga ega chiqadi.
2018-yil. Eron — O‘zbekiston 1:0
“Ozodi” stadionida o‘tgan o‘rtoqlik o‘yinida eronliklar yana 1:0 hisobidagi g‘alabani qo‘lga kiritadi. Uchrashuvdagi yagona golga Ro‘zbeh Cheshmi mualliflik qiladi.
2018-yil. O‘zbekiston — Eron 0:1
O‘sha yili “Bunyodkor” o‘yingohida ham o‘rtoqlik uchrashuvi o‘tkaziladi. Bu safarda ham Eron 1:0 hisobi bilan yutadi. Golni o‘yindan roppa-rosa uch yil oldingi bahsdagidek Mehdi Torabi uradi.
2020-yil. O‘zbekiston — Eron 1:2
Jamoalar o‘rtasidagi oxirgi o‘yin 2020-yilning oktabr oyida o‘tkazilgandi. “Paxtakor” stadionidagi o‘rtoqlik bahsida mehmonlar 2:1 hisobi bilan g‘alaba qozonadi. Sardor Azmun va Mehdi Taremining gollariga Eldor Shomurodov javob qaytaradi.
2023-yil. O‘zbekiston — Eron
Markaziy Osiyo milliy terma jamoalari ishtirokida ilk bor o‘tkazilayotgan musobaqa finalida mintaqaning eng kuchli ikki jamoasi o‘zaro to‘qnash kelmoqda. O‘zbekiston va Eron guruh bosqichida kutilganidek raqiblariga hech qanday imkon qoldirmadi.
Srechko Katanes qo‘l ostidagi jamoa bu o‘yinda statistikani yaxshilash va “qora an’ana”larga barham berish uchun yaxshi imkoniyatga ega.
- O‘zbekiston terma jamoasi o‘z maydonida hech qachon Eronni yuta olmagan
- O‘zbekiston futbolchilari shu vaqtga qadar Eronga 2 ta gol urgan, yana bitta avtogol qayd etilgan
- Baqoyev va Shomurodovdan boshqa hech kim forslar darvozasiga yo‘l topa olmagan.
O‘yin 20-iyun kuni Toshkentdagi “Bunyodkor” stadionida 20:30 da boshlanadi.
Izoh (0)