Eron terma jamoasi bosh murabbiyi Amir G‘alenoi CAFA Nations Cup—2023 finali doirasida O‘zbekistonga qarshi kechadigan bahs oldidan o‘z fikrlari bilan o‘rtoqlashdi.
O‘yin haqida
O‘zbek futboli haqida yetarlicha ma’lumotga egamiz. Eron terma jamoasi bosh murabbiyi sifatida 2006-yilda ham O‘zbekistonga qarshi o‘yin o‘tkazganman. Finalda yaxshi o‘yin guvohi bo‘lamiz degan umiddaman. O‘zbekiston va Eron Osiyoning kuchli jamoalaridan hisoblanadi. Umid qilamanki, tomoshabinlar yordamida yaxshi o‘yin ko‘ramiz.
Sardor Azmunning o‘yinda ishtirok etish masalasi haqida
Hozircha terma jamoa shifokorlari uning o‘yinda ishtirok etish masalasi borasida aniq to‘xtamga kelmadi. Ayni vaqtda u davolanish jarayonida. Yakuniy qarorni o‘yindan oldin chiqaramiz. Futbolchilarning salomatligi biz uchun eng muhimi.
O‘zi tanigan o‘zbek futbolchilari haqida
Temur Kapadze va Server Jeparovni alohida sanab o‘tgan bo‘lardim. Ular futbolchi sifatida ko‘p ishlarni amalga oshirgan, hozir esa murabbiy sifatida o‘zbek futboliga hissa qo‘shmoqda.
O‘zbekiston terma jamoasining kuchli va kuchsiz tomonlari borasida
Jamoa ikkita sxemada ko‘proq harakat qilishini angladik: ba’zida 3 himoyachi, ba’zida esa 4 himoyachi bilan o‘ynaydi. Oxirgi xulosalarni bugungi tahlillardan keyin chiqaramiz.
CAFA musobaqasi haqida
Avvalo musobaqani o‘tkazayotgan Qirg‘iziston va O‘zbekistondagi tashkilotchilarga rahmat aytaman. Umid qilamizki, keyingi musobaqalarda tashkilotchilik masalasi yanada yaxshilanadi.
Har bir ishning boshlanishi qiyin bo‘ladi. Bu CAFA’ning dastlabki musobaqalaridan biri bo‘lgani uchun tabiiyki kamchiliklar bo‘ladi. Tashkilotchilarga omad tilaymiz, keyingi musobaqalarda kamchiliklarni bartaraf etishadi deb o‘ylayman.
Futbolda asosiy jihat ikkita — hurmat va o‘yindan olinadigan lazzat. Umid qilamizki, finalda muxlislar o‘yindan lazzat oladi.
Amir G‘alenoi, Eron terma jamoasi bosh murabbiyi
O‘zbekiston va Eron milliy terma jamoalari o‘rtasidagi o‘yin 20-iyun kuni “Bunyodkor” stadionida bo‘lib o‘tadi. Uchrashuv 20:30 da start oladi. Avvalroq final o‘yinida rossiyalik hakamlar guruhi ishlashi borasida xabar berilgandi.
Izoh (0)