Аламли мағлубиятлар, Али Дайининг ҳет-трики ва 11 ўйинда 2 та гол. Ўзбекистон терма жамоасининг Эронга қарши ўйинлари ҳақида

Футбол бўйича Ўзбекистон миллий терма жамоаси 20 июнь, сешанба куни CAFA Nations Cup—2023 финали доирасида Эронга қарши баҳс олиб боради. Мазкур ўйин олдидан “Дарё” жамоаларнинг ўзаро қарама-қаршилиги тарихини ёдга олади.

Превю

Бу жамоалар ўртасидаги 12-ўйин бўлади. Бунга қадар бўлган 11 ўйиннинг 9 таси Эрон фойдасига ҳал бўлган, битта ўйинда Ўзбекистон ғалаба қозонган ва яна бир ўйин дуранг билан тугаган.

• Энг кўп қайд этилган ҳисоб — 1:0 / 0:1
• Энг йирик ҳисоб — 0:4
• Тўпурар — Али Дайи (3 та гол)

Ўзаро ўйинлар

1998 йил. Ўзбекистон — Эрон 0:4

Жамоаларнинг илк тўқнашуви 1998 йилги Осиё ўйинлари доирасида кечган. Чорак финалда амалдаги чемпион ҳисобланган Ўзбекистон форслардан қақшатқич мағлубиятни қабул қилиб олади. Аввалига Али Мовсави биринчи бўлимда ҳисобни очади. Учрашувнинг сўнгги ўн дақиқалигида Эрон афсонаси Али Дайи кетма-кет уч бор Павел Бугало дарвозасини ишғол қилади.

Бу жамоалар қарама-қаршилигидаги энг сермаҳсул ўйин ва энг йирик ҳисоб бўлиб қолмоқда.

2007 йил. Эрон — Ўзбекистон 2:1

Малайзия майдонларида ўтган 2007 йилги Осиё Кубоги гуруҳ босқичида Ўзбекистон дастлабки турда Эронга 1:2 ҳисобида ютқазади. Аввалига Ўзбекистон Раҳмон Ризоининг автоголи эвазига олдинга ўтиб олади, бироқ иккинчи бўлимда форслар Саид Жалол Ҳуссайни ва Жавад Каземианнинг голлари эвазига ғалабани илиб кетади.

Кейинроқ Ўзбекистон терма жамоаси Малайзия ва Хитойни йирик ҳисобда ютиб, гуруҳдан 2-ўрин билан чиқади. Аммо чорак финалда Саудия Арабистонига ютқазиб қўяди.

2009 йил. Ўзбекистон — Эрон 0:0

Тошкентда ўтган ўртоқлик ўйинида нурсиз дуранг қайд этилади. Бу ўзаро ўйинлар тарихида гол урилмаган ягона учрашув бўлиб турибди.

2012 йил. Ўзбекистон — Эрон 0:1

Футбол бўйича 2014 йилги Жаҳон Чемпионатига ҳал қилувчи саралаш босқичининг 1-турида Ўзбекистон терма жамоаси Эронни қабул қилади. Ўйин давомида майдон эгалари катта устунликка эга бўлади ва вазиятни назорат қилади. Одил Аҳмедов томонидан урилган гол Юичи Нишимура бошчилигидаги ҳакамлар томонидан инобатга олинмайди.

Ҳакам томонидан қўшиб берилган вақтнинг 3-дақиқасида Муҳаммад Ризо Ҳалатбори форсларнинг кам сонли ҳужумларидан бирини голга айлантиради. Ушбу аламли мағлубиятдан кейин Вадим Абрамов Ўзбекистон терма жамоаси бош мураббийлигидан олинади ва унинг ўрнини Миржалол Қосимов эгаллайди.

2012 йил. Эрон — Ўзбекистон 0:1

Орадан беш ой ўтиб “Озоди” стадионида жавоб ўйини бўлиб ўтади. Бу сафар баҳс Тошкентдаги ўйиннинг деярли тескари сценарийси асосида ўтади. Ўзбекистонликлар Улуғбек Бақоевнинг 71-дақиқадаги голи эвазига ғалабани илиб кетади.

Бу ҳозирча Ўзбекистоннинг Эрон устидан қозонган ягона ғалабаси бўлиб турибди.

2015 йил. Ўзбекистон — Эрон 0:1

Жамоалар 2015 йилнинг ноябрида Тошкентдаги “Бунёдкор” стадионида ўртоқлик ўйини ўтказади. Меҳди Тораби томонидан урилган ягона гол форсларга ғалаба келтиради.

2016 йил. Ўзбекистон — Эрон 0:1

2018 йилги Жаҳон Чемпионати 3-саралаш босқичида жамоалар яна бир гуруҳдан жой олади. Бу сафар ҳам Эрон минимал ҳисобдаги ғалабани қўлга киритади. Саид Жалол Ҳуссайни — ғалаба голи муаллифи.

2017 йил. Эрон — Ўзбекистон 2:0

Иккинчи даврадаги ўйинда форслар Ўзбекистонга имконият қолдирмайди. Сардор Азмун ва Меҳди Таремининг голлари Эронга ғалаба келтиради. Бу ғалаба орқали Карлуш Кейруш шогирдлари мундиал йўлланмасига эга чиқади.

2018 йил. Эрон — Ўзбекистон 1:0

“Озоди” стадионида ўтган ўртоқлик ўйинида эронликлар яна 1:0 ҳисобидаги ғалабани қўлга киритади. Учрашувдаги ягона голга Рўзбеҳ Чешми муаллифлик қилади.

2018 йил. Ўзбекистон — Эрон 0:1

Ўша йили “Бунёдкор” ўйингоҳида ҳам ўртоқлик учрашуви ўтказилади. Бу сафарда ҳам Эрон 1:0 ҳисоби билан ютади. Голни ўйиндан роппа-роса уч йил олдинги баҳсдагидек Меҳди Тораби уради.

2020 йил. Ўзбекистон — Эрон 1:2

Жамоалар ўртасидаги охирги ўйин 2020 йилнинг октябрь ойида ўтказилганди. “Пахтакор” стадионидаги ўртоқлик баҳсида меҳмонлар 2:1 ҳисоби билан ғалаба қозонади. Сардор Азмун ва Меҳди Таремининг голларига Элдор Шомуродов жавоб қайтаради.

2023 йил. Ўзбекистон — Эрон

Марказий Осиё миллий терма жамоалари иштирокида илк бор ўтказилаётган мусобақа финалида минтақанинг энг кучли икки жамоаси ўзаро тўқнаш келмоқда. Ўзбекистон ва Эрон гуруҳ босқичида кутилганидек рақибларига ҳеч қандай имкон қолдирмади.

Сречко Катанец қўл остидаги жамоа бу ўйинда статистикани яхшилаш ва “қора анъана”ларга барҳам бериш учун яхши имкониятга эга.

• Ўзбекистон терма жамоаси ўз майдонида ҳеч қачон Эронни юта олмаган
• Ўзбекистон футболчилари шу вақтга қадар Эронга 2 та гол урган, яна битта автогол қайд этилган
• Бақоев ва Шомуродовдан бошқа ҳеч ким форслар дарвозасига йўл топа олмаган.

Ўйин 20 июнь куни Тошкентдаги “Бунёдкор” стадионида 20:30 да бошланади.