Тошкент шаҳар Янгиҳаёт туманида 18 июнь куни ичида 11 киши бўлган лифт пастга тезлик билан қулаб тушгани ҳақида хабар берилганди. Бош прокуратуранинг ҳолат юзасидан “Дарё”га қўшимча маълумот берди.
Қайд этилишича, шу куни тумандаги кўп қаватли уйнинг 2 та фуқаролар ташиш учун мўлжалланган лифтида таъмирлаш ишлари олиб борилаётган бўлган. Шу сабабли юк ташувчи лифтида белгиланган вазндан кўп миқдорда, яъни 1 тоннадан ошиқ 13 нафар фуқаро 16-қаватдан минган. 10-қаватга келганда тушиш тезлиги тезлашиб 1-қаватга тушиш вақтида техник сабабларга кўра лифт бошқаруви йўқолган.
Оқибатда лифт ичида бўлган 13 нафар фуқаронинг ҳаёти хавф остида қолган. Ушбу фуқаролар шифохонанинг травматология бўлимига олиб борилган, тиббий ёрдам курсатилган. Уларнинг 6 нафарига оёқ синиши ташхиси қўйилиб, реабилитация бўлимига ётқизилган. Қолган 7 нафар фуқарога аҳволи қониқарли бўлгани сабабли уйига рухсат берилган.
Олиб борилган суриштирувлар натижасида аниқланишича, ушбу бино “Л.Ҳ” МЧЖ томонидан 2022 йилнинг март ойида қурилиши бошланиб, 2023 йилнинг май ойида фойдаланишга топширилган. Ушбу кўп қаватли уйда жами 3 та лифт бўлиб, улардан 2 таси аҳоли учун ажратилган бўлса, 1 таси юк ташиш учун мўлжалланган.
“Юқорида келтириб ўтилган кўп қаватли уй жорий йилнинг май ойида фойдаланишга топширилган бўлса-да, аҳоли учун фойдаланишга топширилган лифтлар носоз ҳолда бўлгани боис фуқаролар юк ташувчи лифтдан фойдаланиб келишган. Ҳозирда ҳолат бўйича терговга қадар текширув ишлари олиб борилмоқда”, — дейилади хабарда.
Изоҳ (0)