Shavkat Mirziyoyev va Eron prezidenti Ibrohim Raisiyning muzokaralari ikki mamlakat rasmiy delegatsiyalari ishtirokida kengaytirilgan tarkibda davom etdi. Bu haqda Prezident matbuot xizmati xabar berdi.
Unga ko‘ra, prezidentlar tor doiradagi uchrashuv yakunlarini yuqori baholadi hamda kuni kecha O‘zbekiston va Erondan 200 nafardan ziyod tadbirkorlar ishtirokida o‘tgan biznes-forum natijalarini olqishladi. Ikki mamlakat tashqi ishlar vazirliklari o‘rtasida konstruktiv muloqot va parlamentlarimiz o‘rtasida yaqin hamkorlik olib borilayotgani taʼkidlandi.
Savdo-iqtisodiy sohada o‘zaro tovar ayirboshlash hajmi barqaror oshib borayotgani kuzatilmoqda. Mamlakatlarning transport-tranzit kommunikatsiyalaridan foydalanishni kengaytirish ishbilarmonlik aloqalarining faollashishi va yuk tashishlarning ortishiga xizmat qilishiga ishonch bildirildi.
Innovatsiyalar, sunʼiy intellekt, nanotexnologiyalar, kibernetika, texnologiyalar transferi kabi sohalarda tajriba almashish muhimligi qayd etildi. Hududlararo hamkorlik rivojlanayotgani, jumladan, Buxoro viloyati va Hamadon ustoni, Samarqand va Isfaxon shaharlari o‘rtasida to‘g‘ridan to‘g‘ri aloqalar o‘rnatilayotgani qo‘llab-quvvatlandi.
Ikki mamlakat poytaxtlari o‘rtasidagi muntazam aviaqatnovlarning ko‘payishi ishbilarmonlik aloqalari va o‘zaro sayyohlar oqimining ko‘payishiga xizmat qilishiga ishonch bildirildi. Madaniy-gumanitar hamkorlikni yanada mustahkamlash maqsadida O‘zbekiston Fanlar akademiyasi fondlarida saqlanayotgan qadimgi qo‘lyozmalarni chuqur o‘rganish uchun qo‘shma ilmiy guruh tuzishga kelishib olindi.
Muzokaralar yakunida davlat rahbarlari bir qator qo‘shma “yo‘l xarita”larini tayyorlash va erishilgan kelishuvlarni samarali amalga oshirish mexanizmlarini joriy qilish bo‘yicha topshiriq berdi.
Izoh (0)