Mali tashqi ishlar vaziri Abdulaye Diop Birlashgan Millatlar Tashkiloti Xavfsizlik kengashidan BMTning Malidagi Integratsiyalashgan barqarorlashtirish missiyasi (MINUSMA) tinchlikparvar kuchlarini “zudlik bilan” mamlakatdan olib ketishni talab qildi. Diopning so‘zlariga ko‘ra, BMT tinchlikparvar missiyasi mamlakatdagi vaziyatni xavfsizroq qilishni uddalay olmadi, bundan tashqari, ularning harakatlari tufayli mamlakat aholisida “ishonchsizlik hissi” paydo bo‘lgan.
“Aftidan, MINUSMA’ning o‘zi jamiyatdagi keskinlikni kuchaytirib, Malida tinchlik, yarashuv va milliy birlikka katta zarar yetkazgan muammoning bir qismiga aylandi”, — dedi tashqi ishlar vaziri Nyu Yorkdagi Xavfsizlik kengashi yig‘ilishida.
Uning aytishicha, mamlakat hukumati BMT bilan muzokaralar o‘tkazishga tayyor, biroq tashkilot bosh kotibi Antoniu Guterrishning missiya mandatini o‘zgartirish bo‘yicha barcha takliflarini rad etadi.
O‘z navbatida, MINUSMA rahbari El Gassim Vane hukumati norozi mamlakatda missiyani davom ettirish “deyarli imkonsiz”ligini aytdi.
BMT “Vagner”ning Malidagi harakatlarini tekshirishga chaqirdi
BMT vakillari so‘nggi paytlarda Malida xavfsizlik va inson huquqlari bilan bog‘liq vaziyat yomonlashganini qayta-qayta aniqlagan. Yanvar oyida BMTning inson huquqlari bo‘yicha ekspertlari “Vagner” xususiy harbiy kompaniyasi va Mali hukumati kuchlari faoliyatini, jumladan, tinch aholining qirg‘in qilinishi ehtimolini mustaqil tekshirishga chaqirgan edi. Bayonotda aytilishicha, 2021-yildan buyon ekspertlar Malidan qatl qilish, qiynoqlar, ommaviy qabrlar, zo‘rlash, noqonuniy hibsga olish va odam o‘g‘irlash kabilar haqida doimiy ravishda bezovta qiluvchi xabarlar olmoqda.
Izoh (0)