Мали ташқи ишлар вазири Абдулае Диоп Бирлашган Миллатлар Ташкилоти Хавфсизлик кенгашидан БМТнинг Малидаги Интеграциялашган барқарорлаштириш миссияси (MINUSMA) тинчликпарвар кучларини “зудлик билан” мамлакатдан олиб кетишни талаб қилди. Диопнинг сўзларига кўра, БМТ тинчликпарвар миссияси мамлакатдаги вазиятни хавфсизроқ қилишни уддалай олмади, бундан ташқари, уларнинг ҳаракатлари туфайли мамлакат аҳолисида “ишончсизлик ҳисси” пайдо бўлган.
“Афтидан, MINUSMA’нинг ўзи жамиятдаги кескинликни кучайтириб, Малида тинчлик, ярашув ва миллий бирликка катта зарар етказган муаммонинг бир қисмига айланди”, — деди ташқи ишлар вазири Нью Ёркдаги Хавфсизлик кенгаши йиғилишида.
Унинг айтишича, мамлакат ҳукумати БМТ билан музокаралар ўтказишга тайёр, бироқ ташкилот бош котиби Антониу Гутерришнинг миссия мандатини ўзгартириш бўйича барча таклифларини рад этади.
Ўз навбатида, MINUSMA раҳбари Эл Гассим Ване ҳукумати норози мамлакатда миссияни давом эттириш “деярли имконсиз”лигини айтди.
БМТ “Вагнер”нинг Малидаги ҳаракатларини текширишга чақирди
БМТ вакиллари сўнгги пайтларда Малида хавфсизлик ва инсон ҳуқуқлари билан боғлиқ вазият ёмонлашганини қайта-қайта аниқлаган. Январь ойида БМТнинг инсон ҳуқуқлари бўйича экспертлари “Вагнер” хусусий ҳарбий компанияси ва Мали ҳукумати кучлари фаолиятини, жумладан, тинч аҳолининг қирғин қилиниши эҳтимолини мустақил текширишга чақирган эди. Баёнотда айтилишича, 2021 йилдан буён экспертлар Малидан қатл қилиш, қийноқлар, оммавий қабрлар, зўрлаш, ноқонуний ҳибсга олиш ва одам ўғирлаш кабилар ҳақида доимий равишда безовта қилувчи хабарлар олмоқда.
Изоҳ (0)