Hindistonga kuchli “Biparjoy” sikloni yopirildi. G‘arbiy Gujarat shtatida sodir bo‘lgan siklon oqibatida kamida ikki kishi halok bo‘ldi. Shamolning tezligi soatiga 115-125 km ga yetdi, deb xabar beradi The Indian Express.
Rasmiylarga ko‘ra, qurbonlar cho‘pon va uning o‘g‘li bo‘lib, ularni Bxavnagar shahri yaqinida suv oqimi olib ketgan. Ularning 20 ga yaqin qo‘ylari ham nobud bo‘lgan.
Hindiston ommaviy axborot vositalari, siklon bir necha uyga zarar yetkazgan va daraxtlarni ildizi bilan qo‘porib ketganini ma'lum qildi. U 5 mingdan ortiq elektr ustunlarini yiqitgan, 4600 ta qishloqni elektr energiyasisiz qoldirgan.
Meteorologlarning ta’kidlashicha, siklon quruqlikka tushishdan oldin Arab dengizi bo‘ylab kamida 10 kun yo‘l bosgan. Gujaratda u asta-sekin kuchini yo‘qotib, Rajastan shtatiga qarab harakat qilgan.
2021-yil sentabrida “Gulab” sikloni Hindistonning sharqiy qirg‘oqlariga kelib urilgandi. O‘shanda rasmiylar xavfli hududlardan kamida 100 ming kishini evakuatsiya qilgan.
Izoh (0)