Қашқадарё вилоятининг Қарши шаҳридаги президент мактабини 24 нафар битирувчи тамомлади. Уларнинг 18 нафари ўқишни тугатмасидан аввал хориждаги Олий таълим муассасаси талабаси бўлишга улгурган. Бу ҳақда “Дарё”га вилоят ҳокимлиги ахборот хизмати раҳбари Аҳрор Содиқов хабар берди.
Таъкидланишича, Қарши шаҳридаги президент мактабида “Илмни қадрланг, илмга интилинг” шиори остида сўнги қўнғироқ тадбири бўлиб ўтган.
“Тантанали кечада вилоят ҳокими Муроджон Азимов ҳам иштирок этиб, қадрдон мактаб, меҳрибон устозлар билан хайрлашиб, ҳаётнинг янги босқичига қадам қўяётган юртимизнинг эртаси бўлган ёшларни самимий қутлади. Уларнинг ота-оналарига мурожаат қилиб, фарзандларининг иқболи ва ёрқин келажагини кўриш, уларнинг таълим-тарбиясига инвестиция киритиш орқали келажакда халқимиз учун етук кадрлар бўлишини тилади”, — дейди Аҳрор Содиқов.
Тадбирда айтилишича, Қарши шаҳридаги президент мактабига кириш имтиҳонларида 1 та ўринга ўртача 150-170 нафардан талабгор тўғри келади.
“Мазкур замонавий, кўрса кўз қувнайдиган мактабда таҳсил олаётган 167 нафар ўқувчи учун жаҳон стандарти талабларига мос жиҳозланган ўқув, лаборатория, IT хоналари, очиқ ва ёпиқ турдаги спорт майдони, сузиш ҳавзаси, 168 ўринли ётоқхона, ошхона ҳамда тиббий хизмат хоналари мавжуд. Дарслар умумий ўрта таълимнинг давлат таълим стандартлари ва Кембриж халқаро баҳолаш ташкилотининг мослаштирилган дастурлари асосида 29 нафар маҳаллий ва 7 (4 нафар Филиппин, 1 нафар Кения, 1 нафар Жанубий Африка Республикаси ва 1 нафар Буюк Британия) нафар хорижий устозлар томонидан олиб борилади”, — деди тадбирда сўз олган вилоят ҳокими Муроджон Азимов.
Қўшимча қилинишича, мактабнинг 18 нафар битирувчиси муддатидан аввал талабалик бахтига муяссар бўлган. Уларнинг 7 нафари дунёнинг ТОП-500 талик олий ўқув юртларига қабул қилинган. Барчаси хорижий тилларни билиш бўйича халқаро сертификатларни қўлга киритган.
Изоҳ (0)