O‘zbekistonga anomal issiq kirib kelmoqda. Nimalar maʼlum?

O‘zbekistonga anomal issiq kirib kelmoqda. Jumladan, 16-iyun kuni Termiz shahrida havo +42,4 daraja bo‘ldi. “O‘zgidromet” direktori Sherzod Xabibullayevning ogohlantirishicha, 17–19-iyun kunlari respublikada harorat 45 darajagacha ko‘tariladi.

Ayni kunlarda O‘zbekistonda havo harorati ko‘tarilishda davom etmoqda. Sherzod Xabibullayevning xabar berishicha, 17–19-iyun kunlari respublika hududlari bo‘ylab havo harorati 40-41 darajagacha, janubda 42-45 darajagacha ko‘tariladi.

“19-iyunda shimoliy hududlarga, 20-iyunda respublikaning barcha hududlariga Kavkazdan nisbatan salqin havo massasi kirib keladi. Havo harorati 4-6 darajaga pasayadi”, — deb yozadi u.

Gidrometerolog Erkin Abdulahatovning “Daryo”ga maʼlum qilishicha, bu yil iyun oyida nafaqat issiq harorat kuzatilmoqda, balki havodagi namlik ham yuqori darajani ko‘rsatyapti.

“Avvallari chilla paytida bo‘lgan yozdagi anomal issiq yaxshiroq edi. Chunki yozda havo quruqroq bo‘lardi. Hozir tunda harorat pasayish o‘rniga, ko‘tarilib ketmoqda. Oldinlari harorat kechasi 20 darajagacha pasayib, etni junjitadigan havo bo‘lgan. Hozir esa unday emas. Chunki havodagi namlik yuqori. Issiqlar o‘zining vaqtida – chillada bo‘lmayapti. Ilgari yozda namgarchilik 20-30 foizga ortgan bo‘lsa, hozir bu ko‘rsatkich 50 foizgacha ko‘tarildi. Buning oqibatida insonlar organizmi qiynalyapti.

Chilla degan narsa tobora yo‘q bo‘lib ketmoqda. Masalan, shu yilning aprel oyida Xorazmda +42 daraja issiq harorat kuzatildi. Bu zararli, albatta. Aprel – uyg‘onish davri. Havo issiq bo‘lgani hisobiga Xorazm hozir suv tanqisligini boshdan kechiryapti. Anomal issiq zararli bo‘ladi. Tashqi muhitdagi o‘zgarishlarga qarab, o‘zimizning meʼyorlarimizni tezroq ishlab chiqishimiz kerak. Bizda eng issiq harorat iyul oyida kuzatiladi. Lekin u paytda havodagi namgarchilik kamroq bo‘ladi”, — dedi mutaxassis.

Maʼlumotlarga ko‘ra, bugun (16-iyun) Surxondaryo viloyati Termiz shahrida havo harorati +42,4 darajagacha ko‘tarilgan. Ertaga (17-iyun) Qashqadaryo, Buxoro va Navoiy viloyatlarida ham harorat 43 darajagacha ko‘tarilishi prognoz qilingan. 
Avvalroq, qo‘shni Turkmanistonda yaqin kunlarda havo harorati keskin ko‘tarilishi kutilayotgani xabar qilingandi.