Ukrainaning Rossiyaga qo‘shib olingan Lugansk, Donetsk, Xerson va Zaporojye viloyatlarining Kreml tomonidan tayinlangan rahbarlari Rossiya Markaziy saylov komissiyasiga ushbu hududlarda saylovlarni 2023-yil 10-sentabrda — yagona ovoz berish kunida tashkil etish taklifi bilan chiqdi. Bu haqda “Kommersant” manbalarga tayanib xabar berdi, ma’lumotni MSK raisi o‘rinbosari Nikolay Bulayev tasdiqladi.
Qo‘shib olingan hududlar vakillari MSKga aynan qachon murojaat qilgani noma’lum, “Kommersant” ular 12-iyundan avval so‘rov yuborganini ta’kidladi. Nashr suhbatdoshlaridan birining so‘zlariga ko‘ra, Markaziy saylov komissiyasi Rossiya Mudofaa vazirligi bilan maslahatlashuvlar o‘tkazgandan so‘ng murojaatlarga javob beradi (qonunga ko‘ra, buning uchun besh kun vaqt beriladi).
Kremlparast “Mustaqil jamoatchilik monitoringi” loyihasi ekspertlarining taʼkidlashicha, Rossiyaning barcha beshta parlament partiyalari anneksiya qilingan hududlardagi mintaqaviy va munitsipal saylov kampaniyalarida ishtirok etishini eʼlon qilgan.
2022-yil oktabr oyida, Ukrainaning to‘rt viloyati anneksiya qilinganidan ko‘p o‘tmay, Rossiya prezidenti Vladimir Putin ushbu hududlarda harbiy holat joriy qilgandi. May oyida Davlat Dumasi qonunga harbiy holat amal qilayotgan hududlarda saylov o‘tkazishga ruxsat beruvchi tuzatishlar kiritdi.
Izoh (0)