Belarus prezidenti Aleksandr Lukashenko Minsk viloyatiga ish safari chog‘ida mamlakat hududidan yadro qurolini qo‘llash shartini aytib o‘tdi. Bu haqda uning matbuot xizmati xabar berdi.
Lukashenkoga ko‘ra, Belarus hududidan yadro qurolini qo‘llash uchun faqat bitta sabab bo‘lishi mumkin – bu mamlakatga qarshi tajovuz. Prezident bu “ushlab turuvchi qurol” ekani va “bunday qurolga ega bo‘lgan davlatga qarshi urush qilishni hech kim xohlamasligi”ni aytdi.
Belarus rahbari yadro qurolidan foydalanishga to‘g‘ri keladigan vaziyatlardan qochishni xohlashini bildirdi.
“Hozirgi zamonda bu qurollardan foydalanishga qaror qilishimdan o‘zi saqlasin. Ammo bizga qarshi agressiya bo‘lsa, hech qanday yadro qurolidan foydalanish borasida ikkilanish bo‘lmaydi”, — dedi u.
Siyosatchi yana bir bor Belarusda yadro qurolining joylashtirilishi uning iltimosi va xavfsizlikni kafolatlash maqsadida Rossiya tomoniga qo‘yilgan shoshilinch talab ekanini eslatdi.
“Avvaliga men Putindan so‘radim. Keyin zudlik bilan do'stona tarzda talab qildim, hozircha menga taktik qurolni qaytarib berishni aytdim. Bu men uchun yetarli”, — dedi Lukashenko.
Hozirgi bosqichda Lukashenko Belarusda strategik yadroviy qurollarni joylashtirish zaruriyatini ko‘rmayapti, ammo “mamlakatda bu qurollar uchun inshootlar tayyorlanmoqda, ularning barchasi yaxshi ahvolda”.
Belarusda yadroviy qurol joylashtirilishi
25-may kuni Minskda Rossiya mudofaa vaziri Sergey Shoygu va Belarus mudofaa vazirligi rahbari Viktor Xrenin o‘rtasida uchrashuv bo‘lib o‘tdi, unda strategik bo‘lmagan yadro qurollarini Belarus Respublikasiga joylashtirish to‘g‘risidagi hujjat imzolandi.
“Rossiya Belarusga yadro qurolini bermayapti: ular ustidan nazorat va ulardan foydalanish bo‘yicha qaror Rossiya tomonida qoladi”, — dedi Shoygu.
Shuningdek, u, Moskva harbiy-siyosiy vaziyatni hisobga olgan holda, kelajakda “Ittifoq davlati xavfsizligini taʼminlash bo‘yicha qo‘shimcha choralar” ko‘rish niyatida ekanini aytdi. Rossiya mudofaa vaziri allaqachon ko‘rilgan choralar barcha mavjud xalqaro-huquqiy majburiyatlarga mos kelishini bildirdi.
O‘sha kuni Aleksandr Lukashenko Minsk Rossiyadan kelayotgan yadro qurollari xavfsizligi uchun mas’ul ekanini ta’kidladi va uning mamlakati hududiga hech qanday diversantlar kira olmasligini aytdi.
26-may kuni Ukraina prezidenti devoni rahbari maslahatchisi Mixail Podolyak Rossiyaning qo‘shni Belarusda yadro qurolini joylashtirishi Yadro qurolini tarqatmaslik to‘g‘risidagi shartnomani buzish ekanini bildirdi.
Izoh (0)