“Ҳофиз бўлма, сен ҳам одамларнинг тўйида ўлиб кетасан”. Instagram юлдузи Суҳроб Ҳамдамов отасидан эрта айрилгани ҳақида сўзлаб берди (видео)

“Дарё”нинг YouTube’даги каналида миллий қўшиқлари билан Instagram кузатувчилари орасида машҳурликка эришган Суҳроб Ҳамдамов билан суҳбат ташкил қилинди. У илк марта отасидан эрта айрилгани ва яқинлари унинг санъаткор бўлишига жиддий қаршилик қилишгани ҳақида сўзлаб берди.

— Ота меҳри қандай бўлишини ҳам билмайман. Чунки отам раҳматлидан жуда эрта, бир ярим ёшимда айрилганман. Отам ҳофиз бўлиб, халқ хизматидан қайтаётганда автоҳалокатга учраган экан. Албатта, қўлидаги ёш боласи билан бу мусибатни енгиш онамга осон кечмаган. Онам вилоят театрида актриса бўлиб ишларди. Турмуш ўртоғидан айрилиб, оиланинг ёлғиз боқувчиси бўлгач, мени бувимга қолдириб ўзи ишга чиқиб кетган.

Эсимни таниганимдан мен бувим билан бирга эдим. Бувим, холам ва онам отамнинг йўқлигини билдирмасликка ҳаракат қилишарди. Қонда бўлса, барибир санъат ўзига оҳанрабодек тортар экан. Болаликдан санъатга қизиққанман. Аммо бувим раҳматли фикримдан қайтариш учун роса ҳаракат қилган. “Отанг одамларнинг тўйини ўтказаман деб ўлиб кетди, онам ҳам ижод билан бўлиб ўзидан ортмайди”, деб кўп гапирарди. Аммо “Мен санъат институтига ҳужжат топшираман, ўқишга кирай ҳеч кимга оғирлигим тушмайди”, деб кўп гапирардим. Ниятим қатъийлигини билгач, бувим раҳматли “Айтган ўқишига олиб борақол”, деган.

Онам иккимиз Жиззахдан келиб, ҳозирги Ўзбекистон давлат санъат ва маданият институтига ҳужжат топширганмиз. Аммо шартнома асосида ўқишга кирганман. Оиламизнинг асосий боқувчилари аёллар бўлгани учун онам “Бу йил ўқима, келаси йил қайта ўқишга топширасан”, деганди. Аммо унамаганман. Кейин билсам уйдагилар шартнома пулини тўлашга қийналиб, бувим раҳматли тилла узугини учта қўшнига олиб чиқиб ҳам сотолмаган экан. Буни менга айтишмаган, анча кейин бошқа одамлардан эшитиб қолгандим. Шундай кейин ўқишга бормай, келаси йил қайта ҳужжат топширганман. Бу гал эса омадим келиб, грант асосида ўқишга қабул қилинганман, — дейди Суҳроб Ҳамдамов.

Хонанда қайси вазиятларда отасининг йўқлиги билиниши ва ҳаётда нимадан кўпроқ қўрқиши ҳақида ҳам тўхталиб ўтди.

— Анча йил ижара уйда яшадим. Жуда қийин вазиятларни бошдан кечирдим. Шундай вазиятларда бошимда отам бўлганида бундай бўлмасмиди, деб нолиб қўярдим. Аммо шукрки, ёруғ кунлар келди. Яратгандан ҳамиша қизларим улғайиб, ўз ўрнини топмагунига қадар жонимни олма деб сўрайман. Чунки ўзим отасизлик қандай эканлигини яхши биламан. Отасиз ўсиш ва муҳтожликни бошдан кечириш осон эмас, —дейди хонанда Суҳроб Ҳамдамов.

Хонанда билан бўлган суҳбатни қуйида тўлиқ томоша қилишингиз мумкин.