Rametovlar sulolasining kenja vakilli Aziz Rametov bolaligidan san’atkorlar davrasida ulg‘aygan. Ammo ota-onasi uning san’at vakili bo‘lishini istashmagan. Bo‘lajak aktyorning harbiy sohadan “quvilishi”, uzoq vaqt uylanolmagani va armonlari haqida hikoya qilamiz.
Aziz Rametov boshqalarga o‘xshamaydigan xarakter egasi. Qarangki, uning dunyoga kelishi ham noodatiy bo‘lgan ekan. Bu haqida aktyorning onasi Saida Rametova hikoya qilib bergan.
— Hayotimdagi eng shirin voqealar aynan lift bilan bog‘liq. Turmushga chiqmasimdan avval oshiqlar juda ko‘p edi. Hamma yigitlar “Bu qiz juda kalondimog‘, hech kimni mensimaydigan, hammaga yo‘q-yo‘q deb javob beradi”, deyishgan.
Jumadulla Rametov men haqimda eshitgandan so‘ng “Shunaqami u, ana ko‘rasizlar, bu qizga men uylanaman”, degan ekan. U paytda ikkimiz ham ijodkorlar yotoqxonasida yashardik. Men 9-qavatda, Jumadulla esa 7-qavatda turgan. Asosiy sevgimiz o‘sha yerda boshlangan. Men o‘qib yurganimda hech kimga qaramaganman. Esimda bor, liftga chiqqanimda ortimdan chiqib olgan. Liftdan tushishimga qo‘ymagan. Shu vaqtda ular menga sevgi izhor qilib, uylanishini aytganlar. 1988-yilda ikkinchi farzandim Aziz Rametov liftda tug‘ilgan, — deydi Saida Rametova.
Aziz Rametov bolalikdan san’at ichida o‘sgan. Ammo ota-onasi o‘g‘illarining san’atkor bo‘lishini istashmagan.
— Negadir harbiy bo‘lishimizni orzu qilishgan. Ammo akam ham men ham bu orzularini amalga oshirolmadik. Hozirgi “Temurbeklar” harbiy maktabiga birinchilardan bo‘lib o‘qishga kirganman. U paytda boshqa nomlanar edi. O‘sha paytda Sobir aka degan direktor rahbarlik qilardi. Bir kuni ota-onamni oldiga chaqirib “O‘g‘lingiz avvalgidan ancha yaxshi tomonga o‘zgargan. Ammo baribir bunday harbiy chiqmaydi. Kun kelib chegarada turganda, ikkita latifa evaziga ham sirlarni sotib yuboradigan bola”, deb hazil qilgandi. Shundan keyin ota-onam Estrada va sirk kollejida o‘qishimga ruxsat berishgan. Ungacha “San’atkor bo‘lmaysan”, deb jiddiy qarshilik qilishardi, — deydi Aziz Rametov.
Aziz Rametov bolaligidan sho‘x va o‘yinqarog‘ yigit bo‘lgan. Ko‘p hollarda janjallarga aralashib qolar, ba’zan dahanakilari ham jiddiy tus olardi.
— O‘g‘il bolaning boshidan har xil kunlar o‘tadi. Menimcha, janjallar borasida ota-onamni bezor qilgan bo‘lsam kerak. Buning uchun ulardan uzr so‘rayman. O‘zim janjalkash emasdim, ammo negadir shunaqa vaziyatlarga tushib qolaverardim. Nafaqat do‘stni, tanish-bilishni ham shunchaki qiyin vaziyatda tashlab ketolmasligim pand bergandir, — deydi Aziz Rametov.
“Ona mashhur san’atkor bo‘lgani uchun bu ham artist bo‘ldi”, — bu gap qahramonimizga juda og‘ir botgani va ancha vaqtgacha buni atrofdagilardan yashirgani haqida so‘zlab bergan.
— Onam “Urushsang yoningni olishim mumkin, ammo hech bitta rejissorga o‘g‘limga rol bering deb iltimos qilmayman”, deb shart qo‘ygan. Menimcha, bu gapni ham san’atkor bo‘lmasligim uchun aytgan. Sababini bilmayman-u, ammo ota-onam ancha vaqtgacha meni san’atga bo‘lgan qiziqishimni so‘ndirmoqchi bo‘lishgan. Qamara Komolovaning filmida suratga tushganmiz. Rejissor bilan uchrashgani borganimizda meni onamga tanishtirib “Saida Rametova bu sizning o‘g‘lingiz bo‘ladi”, degan. Onam kulib ha bilaman o‘g‘lim ekanligini degan. Rejissor haqiqatni bilgandan keyin “Nega aytmading?” deb yuzimga yengil tarsaki tushirgandi. Haqiqatan ham achna vaqtgacha ko‘pchilik Saida va Jumadulla Rametovlarning farzandi ekanligimni bilishmagan. Men ham hamma qatori kasting topshirib filmlarga tasdiqlanganman, — deydi Aziz Rametov.
Aktyor faoliyati davomidagi eng qiyin rolni “O‘tov” filmida ijro etgani va o‘limni his qilgani haqida so‘zlab berdi.
— Rollarim rang-barang. Aslida rolni yaratish, boshqa inson bo‘lib yashash oson emas. Ammo menga eng qiyin kechgan rolni “O‘tov” filmida yaratganman. Bo‘ynimga qadar tuproqqa ko‘mib qo‘yishganida o‘lim hissini tuyganman. Juda qo‘rqinchli edi. Hatto, qo‘rqqanimdan ertasi kuni labimga uchiq ham toshib ketgandi, — deydi aktyor Aziz Rametov.
Aziz Rametov o‘zini nafaqat aktyorlikda, balki xonandalik va rejissorlikda ham sinab ko‘rgan. “Arslon izidan” va “Qaramlik” nomli filmlarni suratga olgan. Ammo rejissor faoliyati unga ancha qimmatga tushgan.
— “Arslon izidan” ekstremal janrdagi film. Uni suratga olish uchun juda katta mablag‘ sarflangan. Hatto minib yurgan mashinasini sotib ham filmga tikkanman. U paytda juda qiziqqon, san’atdan boshqa hech narsani o‘ylamaydigan bola edim. Hatto, mahalla ichida rekvizit qurol-yaroqlar bilan olinadigan sahna bizga juda qimmatga tushgan. Tegishli tashkilotlarni ogohlantirmaganimiz uchun syomka maydonchasiga maxsus guruh kelib, barchamizni qo‘lga olishgan. Rejissorlikning ketidan bir necha kun qamoqda ham o‘tirib chiqqanman, —deydi aktyor Aziz Rametov.
Aktyor 2007-yili rus kinoijodkorlari tomonidan suratga olingan “Zastava” filmida serjant Raimjonov rolini ijro etgan. Filmdan so‘ng unga prodyuserlik kompaniyalari Rossiyada qolib ijod qilishni taklif etgan.
— Hayotimdagi eng katta gonorarni o‘sha filmdan olganman. Kuniga 1 000 AQSH dollaridan pul to‘lashgan. Keyin ularda aktyorlar agentlar yordamida ishlar ekan. Menga ham bir nechta agentlik firmalari aloqaga chiqib, hamkorlikni taklif etgan. Ular bilan ishlash uchun Rossiyada qolishim kerak edi. Menda vatanparvarlik hissi yuqorimi bilmadim, u yerda qolib ketishni istamaganman, — deydi Aziz Rametov.
Aziz Rametov oila qurmasidan avval topgan pulini kayf-u safoga sarflaganini yashirmaydi. Bu qaramlikdan qanday qutilgani va u haqida film suratga olishi kerakligini tushunib yetgani ham so‘zlab bergan.
— Uch oyda 90 ming AQSH dollari doromad topgan paytlarim ham bo‘lgan. Eng qizig‘i, u pullarning birortasini uyga olib kirmaganman. Topgan pullarimning barakasi yo‘q edi, yoki ularni to‘g‘ri sarflashni bilmasdim. O‘yin-kulgi, do‘st-birodarlikni yaxshi ko‘rardim. Mablag‘imni atrofdagilardan, do‘stlarimdan qizg‘onmasdim. Eng alam qiladigani shu kungacha ota-onamga “Manavi pulni ishlab topdim”, degan bola emasman. To‘g‘ri uyga ro‘zg‘orlik qilardim, ammo pul bermasdim. Shularni o‘ylab ham uylanishim kerakligini anglab yetdim.
Bugungi kunga turli qaramlikka berilgan yoshlar juda ko‘p. Bunday insonlarning ko‘pi bilan tanishman. Ular ruhan qiynaladi, ammo bu vaziyatdan chiqib ketishga o‘zida kuch topolmaydi. “Qaramlikdan qutilib hayotimni o‘zgartiraman”, degan insonlarni qo‘llab-quvvatlash maqsadida “Qaramlik” nomli filmni suratga oldim. Uni ko‘rib yoshlar o‘zlariga tegishli xulosa olishadi deb o‘ylayman, — deydi Aziz Rametov.
Ijodkor shu kungacha birorta mukofotni qo‘lga kiritmagani va hatto “Nihol” nomidagi davlat mukofotini pul berib bo‘lsa-da, olmoqchi bo‘lgani haqida so‘zlab bergan.
— Mehnatimizdan foydalanishadi. To‘g‘ri shunga yarasha pulni ham olamiz. Ammo ijodkorga motivatsiya berib turish kerak. O‘ttiz ming so‘mlik faxriy yorliqqa tashakkurnoma yozib berishsa ham odamning ko‘ngli qanchalik ko‘tariladi. Shu kungacha birorta mukofotni qo‘lga kiritganim yo‘q. Negadir bu narsa juda alam qiladi. Hatto bir yili “Nihol”ni olish uchun pora ham berganman, ammo mendan pulni olgan aka firibgar bo‘lib chiqqan. Onam ham shuncha yildan beri san’at va madaniyat sohasini riovjlantirish uchun xizmat qiladi. Ammo haligacha Xalq artisti bo‘lolgani yo‘q. Uning shogridlari yoki undan keyin sahnaga chiqqanlar allaqachon bunday mukofotlarni qo‘lga kiritib bo‘lishdi, — deydi Aziz Rametov.
Aziz Rametov 2022-yilning mart oyida Shahlo Umarova ismli qiz bilan oila qurdi. Ularning to‘yi haqiqiy shov-shuvga aylandi desak mubolag‘a bo‘lmaydi. Yil yakunida ular ota-ona bo‘lish baxtiga musharraf bo‘lishdi. Baxtli juftlik o‘g‘liga Muhammadamin deb ism qo‘yishgan.
Izoh (0)