Toshkentda jamoat transportini 24 soat davomida boshqarish va nazorat qilishni amalga oshiruvchi markaz qurilishi mumkin. Bu haqda Transport vazirligi matbuot xizmati xabar berdi.
Ma’lum qilinishicha, transport vaziri Ilhom Mahkamov Janubiy Koreyaga tashrifi davomida Koreya avtomobil yo‘llari korporatsiyasining tezkor magistral yo‘llar boshqarmasi markazida bo‘ldi.
Bugungi kunda ushbu markazda Koreyaning magistral avtomobil yo‘llarini (taxminan 5 000 km) 24 soat davomida boshqarish va nazorat qilishni amalga oshiradi.
Markazga tashrifi yakunida tomonlar O‘zbekiston poytaxtida jamoat transporti sohasida ham xuddi shunday markazni barpo etish imkoniyatlarini muhokama qilgan.
2023-yilning boshlarida “Toshkent shahrida transport infratuzilmasini yanada rivojlantirish va yo‘l harakatini raqamli boshqarish tizimini joriy etishga doir qo‘shimcha chora-tadbirlar to‘g‘risida”gi prezident qarori loyihasi e’lon qilingandi. Unda transport infratuzilmasini harakat xavfsizligini ta’minlashning zamonaviy talablariga to‘liq muvofiqlashtirish, tirbandlik yuqori bo‘lgan chorrahalar va avtomobil yo‘llarida markazlashgan raqamli boshqarish tizimini joriy etish va bu orqali tirbandliklar sonini kamaytirish ko‘zda tutilgandi.
Izoh (0)