“Toshkent shahrida transport infratuzilmasini yanada rivojlantirish va yo‘l harakatini raqamli boshqarish tizimini joriy etishga doir qo‘shimcha chora-tadbirlar to‘g‘risida”gi prezident qarori loyihasi e’lon qilindi.
Unda qayd etilishicha, ko‘rilayotgan chora-tadbirlarga qaramasdan, avtomobil yo‘llarida yo‘l harakati ishtirokchilari tomonidan sodir etilayotgan qoidabuzarliklar va og‘ir oqibatlarga olib kelayotgan YTHlar soni hali ham yuqoriligicha qolmoqda. Bu o‘z navbatida shaharda yo‘l harakati xavfsizligini ta’minlash tizimini kompleks isloh qilish zarurligini ko‘rsatmoqda.
Jumladan, transport infratuzilmasini harakat xavfsizligini ta’minlashning zamonaviy talablariga to‘liq muvofiqlashtirish, tirbandlik yuqori bo‘lgan chorrahalar va avtomobil yo‘llarida markazlashgan raqamli boshqarish tizimini joriy etish va bu orqali tirbandliklar sonini kamaytirish, ushbu sohadagi qoidabuzarliklarni samarali aniqlash tizimini yo‘lga qo‘yish, avtomobil yo‘llari bo‘ylab tartibga solingan yo‘l bo‘yi pullik avtomobil to‘xtash joylarini tashkil qilish, shuningdek, jamoat transportining ustuvorligini ta’minlash talab etilmoqda.
Shu munosabat bilan “Toshkent shahar tirbandlik yuqori bo‘lgan ko‘chalarida o‘tkazuvchanlik qobiliyatini oshirish, transport oqimlarini samarali boshqarishni joriy etish va yo‘l o‘tkazgichlari qurish konsepsiyasi” tasdiqlanadi.
Unga ko‘ra quyidagi choralar amalga oshiriladi:
- chorrahalar va avtomobil yo‘llaridan o‘tayotgan transport vositalari harakatini samarali boshqarish va taqsimlash tizimini yaratish orqali tirbandliklar yuzaga kelishini oldini olish va ularning sonini keskin kamaytirish;
- avtomobil yo‘llari infratuzilmasini takomillashtirishda jamoat transporti harakati ustunligini ta’minlash orqali jamoat transportining jozibadorligini oshirish va shahar markazida harakatlanayotgan yengil avtotransport vositalarining sonini 20 foizgacha qisqartirish;
- tartibga solingan yo‘l bo‘yi pullik avtomobil to‘xtash joylari tizimini tashkil etish orqali pullik avtomobillar to‘xtash joylari sonini ko‘paytirish va bevosita shaxsiy avtotransport vositalaridan foydalanish darajasini kamaytirish;
- chorrahalar geometrik parametrlarini o‘zgartirish yo‘li bilan avtotransport vositalarining o‘tkazuvchanligini 15 foizga oshirish, avtotransport vositalaridan atrof tabiiy muhitga yetkazilayotgan zararlar miqdorini 35 foizgacha kamaytirish;
- yo‘l o‘tkazgichlar va chorrahalarni loyihalash va qurishda zamonaviy texnologiyalarini tatbiq etish orqali raqamlashtirish ko‘rsatkichini 90-95 foizga ko‘tarish;
- avtotransport vositalari og‘irligi va gabariti nazorati bo‘yicha statsionar shoxobchalari tizimini yaratish orqali shahar yo‘llari bo‘ylab yuk tashuvlarini tartibga solish.
Ushbu yo‘nalishda jamoat transporti jozibadorligini oshirish 2 ta asosiy ko‘rsatkich: vaqt va narx bo‘yicha jozibadorlik aholi tanlovida hal qiluvchi omil hisoblanadi.
Shaxsiy transport yoki taksida manzilga yetib boradigan aholi uchun barqaror jamoat transportida ijtimoiy tariflardan foydalanish imkoniyatini taqdim etish orqali jamoat transportining ustuvorligi ta’minlanadi.
Bunda vaqt ko‘rsatkichi bo‘yicha ustuvorlik hamda jamoat transporti barqarorligini ta’minlash, avtobuslarga alohida yo‘lak orqali to‘siqsiz harakatlanish imkonini berishdan boshlab, chorrahalarda harakatni tashkil etishda avtobus yo‘laklari uchun alohida fazalar, avtobuslarga alohida yo‘lak ajratish imkoniyati mavjud bo‘lmagan chorrahalarda avtobuslarning harakat jadvaliga muvofiq yashil chiroq tamoyilini joriy etish, shuningdek, aholi gavjum obyektlarga piyoda kirish uchun eng qulay joylarda bekatlarni joylashtirish kabi tadbirlar tizimli ravishda amalga oshiriladi.
Izoh (0)