Toshkent viloyati Bo‘ka tumanida tergovga jalb qilingan fuqaro shifoxonada vafot etgani xabar qilingandi. Viloyat prokuraturasi holat bo‘yicha bayonot e’lon qildi.
Unda bildirilishicha, Bo‘ka tuman IIB tomonidan tergovga jalb qilingan gumonlanuvchi vafot etgani yuzasidan tuman prokuraturasi tomonidan Jinoyat kodeksining 235-moddasi (qiynoqqa solish va boshqa shafqatsiz, g‘ayriinsoniy yoki qadr-qimmatni kamsituvchi muomala hamda jazo turlarini qo‘llash) bilan jinoyat ishi qo‘zg‘atilib, viloyat prokuraturasining o‘ta og‘ir jinoyatlarni tergov qilish bo‘limi tomonidan tergov harakatlari olib borilmoqda.
Tergov harakatlari davomida ikki nafar tezkor xodim qamoqqa olingan.
“Hozirda ijtimoiy tarmoqlarda ushbu holat yuzasidan turli asoslanmagan maʼlumotlar tarqalmoqda. Mazkur holat viloyat prokuraturasi tomonidan alohida nazoratga olingan bo‘lib, tergovni chalg‘ituvchi, mish-mishlardan kelib chiqqan asossiz maʼlumotlarga ishonmasliklaringizni hamda rasmiy manbalar orqali berilayotgan maʼlumotlarga tayanishingizni so‘rab qolamiz”, — deyiladi bayonotda.
Izoh (0)