Kiyev Volin qirg‘ini uchun Varshavadan kechirim so‘ramagan, shuning uchun Ukraina prezidenti Vladimir Zelenskiy zimmasiga ko‘proq mas’uliyat olib, uzr so‘rashi kerak, dedi Polsha Tashqi ishlar vazirligi matbuot kotibi Lukash Yasina Onet nashriga bergan intervyusida.
Jurnalistning aniqlashtiruvchi savoliga javoban Yasina Zelenskiyga: “Kechiring, uzr so‘raymiz”, deb aytishni taklif qildi. Bunday so‘zlar ikki davlat o‘rtasidagi munosabatlarga ijobiy ta’sir ko‘rsatadi, deb hisoblamoqda TIV vakili.
“Biz, polyaklar, davlatimiz tomonidan ukrainaliklarga qarshi sodir etilgan jinoyatlar uchun Polshaning javobgarligini o‘z zimmamizga olganmiz. Ukraina tomonida esa yetarlicha bunday qilinmayapti. To‘g‘ri, ko‘p narsa yaxshi tomonga o‘zgardi, lekin baribir bularning barchasi Ukraina elchisi darajasida qilingan”, — dedi Yasina.
Shu bilan birga, u Polsha va Ukraina o‘rtasidagi munosabatlarda boshqa ko‘p, muhimroq masalalar mavjudligini tan oldi: “Zelenskiyning boshqa tashvishlari ko‘p, Ukraina xalqi uchun hozir Volin qirg‘ini muammosi birinchi darajali emas”.
Volin qirg‘ini — G‘arbiy Ukraina hududida 1942–1943-yillarda sodir etilgan voqealarning nomi. Ukraina millatchilari tashkiloti — Ukraina qo‘zg‘olonchilar armiyasi mahalliy rahbariyatining buyrug‘i bilan Ikkinchi jahon urushi boshlanishidan oldin hozirgi Volin viloyati hududida yashagan etnik polyaklarni o‘ldirilgan. Polsha rasmiylarining hisob-kitoblariga ko‘ra, 100 mingga yaqin odam halok bo‘lgan.
2016-yilda Polsha Seymi Volin qirg‘inini genotsid deb tan olish to‘g‘risidagi rezolyutsiyani qabul qildi, deputatlar, shuningdek, 11-iyulni o‘sha voqealar qurbonlarini xotirlash kuni sifatida ko‘rib chiqishga qaror qildi.
2022-yil iyul oyida prezident Anjey Duda Ukrainani bo‘lib o‘tgan voqealarga o‘z munosabatini aniq qilib bildirishga chaqirdi va bu mavzu uchun “haqiqatning qat’iy bayoni” kerakligini aytdi. Kuzda polshalik jurnalistga intervyu berish chog‘ida Zelenskiy Volin qirg‘ini mamlakat uchun “juda og‘riqli voqea” bo‘lganini, uning prezidentligi davrida munosabatlar “yuqori darajaga chiqayotgan bo‘lsa-da, bu haligacha ko‘plab polyaklar uchun yetarli emasligini” aytgan.
Izoh (0)