Киев Волин қирғини учун Варшавадан кечирим сўрамаган, шунинг учун Украина президенти Владимир Зеленский зиммасига кўпроқ масъулият олиб, узр сўраши керак, деди Польша Ташқи ишлар вазирлиги матбуот котиби Лукаш Ясина Onet нашрига берган интервьюсида.
Журналистнинг аниқлаштирувчи саволига жавобан Ясина Зеленскийга: “Кечиринг, узр сўраймиз”, деб айтишни таклиф қилди. Бундай сўзлар икки давлат ўртасидаги муносабатларга ижобий таъсир кўрсатади, деб ҳисобламоқда ТИВ вакили.
“Биз, поляклар, давлатимиз томонидан украиналикларга қарши содир этилган жиноятлар учун Польшанинг жавобгарлигини ўз зиммамизга олганмиз. Украина томонида эса етарлича бундай қилинмаяпти. Тўғри, кўп нарса яхши томонга ўзгарди, лекин барибир буларнинг барчаси Украина элчиси даражасида қилинган”, — деди Ясина.
Шу билан бирга, у Польша ва Украина ўртасидаги муносабатларда бошқа кўп, муҳимроқ масалалар мавжудлигини тан олди: “Зеленскийнинг бошқа ташвишлари кўп, Украина халқи учун ҳозир Волин қирғини муаммоси биринчи даражали эмас”.
Волин қирғини — Ғарбий Украина ҳудудида 1942–1943 йилларда содир этилган воқеаларнинг номи. Украина миллатчилари ташкилоти — Украина қўзғолончилар армияси маҳаллий раҳбариятининг буйруғи билан Иккинчи жаҳон уруши бошланишидан олдин ҳозирги Волин вилояти ҳудудида яшаган этник полякларни ўлдирилган. Польша расмийларининг ҳисоб-китобларига кўра, 100 мингга яқин одам ҳалок бўлган.
2016 йилда Польша Сейми Волин қирғинини геноцид деб тан олиш тўғрисидаги резолюцияни қабул қилди, депутатлар, шунингдек, 11 июлни ўша воқеалар қурбонларини хотирлаш куни сифатида кўриб чиқишга қарор қилди.
2022 йил июль ойида президент Анжей Дуда Украинани бўлиб ўтган воқеаларга ўз муносабатини аниқ қилиб билдиришга чақирди ва бу мавзу учун “ҳақиқатнинг қатъий баёни” кераклигини айтди. Кузда полшалик журналистга интервью бериш чоғида Зеленский Волин қирғини мамлакат учун “жуда оғриқли воқеа” бўлганини, унинг президентлиги даврида муносабатлар “юқори даражага чиқаётган бўлса-да, бу ҳалигача кўплаб поляклар учун етарли эмаслигини” айтган.
Изоҳ (0)