“Daryo” reportaji: Bir oy davom etadigan xalqaro gullar festivaliga tayyorgarlik ko‘rayotgan Namangan (video)

Namanganda 62-xalqaro gullar festivaliga astoydil tayyorgarlik ko‘rilmoqda. Bu haqda “Daryo” muxbiri Azizbek Abduvaliyev xabar bermoqda.

Bu galgi festivalning oldingi yillardagidan farqli jihatlari ko‘p.

Birinchidan, festival 5-10 yoki 15 kun emas, naq bir oy davom etadi.

Ikkinchidan, bayram tadbirlari avvalgidek faqat Bobur nomli bog‘ni emas, “Afsonalar vodiysi” parkini ham qamrab oladi.

Uchinchidan, xalqaro maqomni olgan festivalga ko‘plab dunyo estradasi yulduzlarining tashrifi kutilmoqda. Jumladan, turkiyalik xonanda Rafet el Roman, ozarbayjonlik Tolib Tale va Zaynab Hasaniy konsert dasturlari bilan ishtirok etishlarini tasdiqladi.

Bir oy davom etadigan festivalning har bir kuni maroqli o‘tishini taʼminlash maqsadida keng ko‘lamdagi madaniy-ko‘ngilochar dasturlar tuzilgan.

Jumladan, bayram davomida hunarmandlar, etnosport va dunyo taomlari festivallari, o‘zbek palovi chempionati, lazer va dron-shou, qo‘l jangi bo‘yicha xalqaro turnir, “Talant-shou” va “Illyuziya-shou”, Farg‘ona vodiysi moda haftaligi va jahon kinosi haftaligi, O‘zbekiston Milliy simfonik orkestrining ochiq osmon ostidagi konserti, O‘zbekiston davlat drama teatri spektallari va O‘zbek davlat sirki tomoshalari bo‘lib o‘tadi.

Eng asosiysi, Namangan mehmonlarni bog‘lar, ko‘cha va xiyobonlarga ekilgan 50 dan ortiq turdagi 30 milliondan ziyod gullar bilan qarshi oladi.

Festival davomida gullardan nafaqat bahra olish, balki xo‘jalik yoki xonadon uchun xarid qilish imkoniyati ham yaratiladi. Buning uchun Bobur bog‘i atrofida savdo rastalari tayyorlanmoqda.