Samarqand va Qashqadaryo viloyatida o‘qishga kiritib qo‘yish bilan bog‘liq firibgarlik holatlari fosh etildi, deb xabar beradi Bosh prokuratura huzuridagi departament.
Qayd etilishicha, departamentning Samarqand viloyat boshqarmasi tomonidan tergovga qadar tekshiruv o‘tkazilgan. Tekshiruvda Muhammad Al-Xorazmiy nomidagi TATU Samarqand filiali bo‘lim boshlig‘i K.Z. fuqaro R.R.ning farzandining o‘qishini qo‘shni Tojikistondagi oliy taʼlim muassasasidan O‘zbekiston—Finlyandiya institutiga ko‘chirib berish evaziga 1,6 ming dollarni qo‘lga kiritgani aniqlanib, ushbu pullar hisobidan 500 dollar qaytarilishi protsessual tartibda rasmiylashtirilgan.
Shu kabi, departamentning Qashqadaryo viloyat boshqarmasi tomonidan IIB xodimlari bilan hamkorlikda o‘tkazilgan tezkor tadbirda R.B. ismli shaxs fuqaro M.Z.ni tanishlari yordamida 1 000 dollar evaziga Muhammad al-Xorazmiy nomidagi TATU Qarshi filialiga o‘qishga kiritib qo‘yishni vaʼda qilib, shundan 500 dollarini olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (Firibgarlik) va 28, 211-moddasi (Pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
May boshlarida Samarqand, Sirdaryo va Buxoro viloyatlarida o‘qishga kiritib qo‘yishni vaʼda qilgan shaxslar ushlangani to‘g‘risida xabar berilgandi. Fevral oxirlarida esa O‘zbekiston davlat jismoniy tarbiya va sport universitetining Farg‘ona filialida 2022/2023-o‘quv yilida imtihon natijalari o‘zgartirilib, abituriyentlar qasddan yiqitilgani ma’lum bo‘lgan edi.
Izoh (0)