Samarqand shahridagi 59-sonli “Nurli maskan” ko‘zi ojizlar maktabi o‘quvchisini urib yuborib, uning o‘limiga sababchi bo‘lgan avtobus haydovchisi qo‘lga olingan. Bu haqda “Daryo”ga viloyat IIB axborot xizmati rahbari Jahongir Sagdullayev xabar berdi.
Taʼkidlanishicha, 2023-yil 13-may kuni soat 15:30 larda Samarqand shahar “Rudakiy” mahallasi hududidan o‘tuvchi Beruniy-Gagarin yo‘nalishidagi avtomobil yo‘lida Isuzu rusumli avtobus haydovchisi mashinasini boshqarib borayotgan vaqtida, yo‘ldan harakatlanib o‘tayotgan maktab o‘quvchisini urib yuborgan. 2004-yilda tug‘ilgan piyoda shifokorlar tomonidan ko‘rsatilgan tibbiy yordamlarga qaramasdan 2023-yil 15-may kuni shifoxonada vafot etgan.
“Mazkur holat yuzasidan Jinoyat kodeksining 266-moddasi 2-qismi (odam o‘limiga sabab bo‘lgan transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilib, dastlabki tergov harakatlari olib borilmoqda”, — deydi Jahongir Sagdullayev.
Izoh (0)