Венгрия пойтахти Будапешт шаҳрида 19 май куни Ўзбекистон—Венгрия олий таълим муассасалари ректорлари II форуми ўтказилди. Бу ҳақда Олий таълим, фан ва инновациялар вазирлиги ахборот хизмати хабар берди.
Хабарга кўра, йиғилишда университетларнинг фармакология, фармацевтика ва тиббиёт мутахассисликлари бўйича кадрлар тайёрлаш ҳамда ўқув жараёнига инновацияларни жорий этиш, қишлоқ хўжалиги, сув ресурсларидан фойдаланиш соҳасида технолог мутахассислар тайёрлаш, замонавий биотехнологиялар ёрдамида саноат сувини тозалаш ва ерларни томчилатиб суғориш, Венгрия ОТМда ўзбек тилини ўқитиш масалалари муҳокама қилинди.
Венгрия томонига республика ҳукумати томонидан амалга оширилаётган таълим ва илмий лойиҳалар, жумладан, кимё саноати учун ўқув-ишлаб чиқариш кластерини яратиш лойиҳаси тақдим этилди. Сўнг музокаралар якуни бўйича муҳандислик, мехатроника, робототехника, ижтимоий-иқтисодий соҳаларда 30 дан ортиқ меморандум ва шартнома имзоланиб, кадрларни биргаликда тайёрлаш бўйича ўзаро ҳужжатлар алмашилди.
Шунингдек, иккита сексия музокаралари натижалари ўқиб эшиттирилиб, форум якунлари юзасидан резолюция қабул қилинди.
Изоҳ (0)