Samarqand viloyati Toyloq tumani 17-may kuni erkak ikki o‘g‘lini o‘ldirdi. Bu haqda “Daryo”ga Bosh prokuratura axborot xizmati xabar berdi.
Ma’lum qilinishicha, shu kuni soat 03:00 da 39 yoshli erkak Rossiyaga ishlash uchun ketgan turmush o‘rtog‘ining begona shaxslar bilan ishqiy munosabatda bo‘lgani aks etgan videolarni ko‘rib, u bilan telefon orqali janjallashgan.
Shundan so‘ng u turmush o‘rtog‘idan qasd olish maqsadida yashash uyida uxlab yotgan 2 nafar voyaga yetmagan o‘g‘lini (2015 va 2017-yillarda tug‘ilgan) qasddan o‘ldirgan va tuman ichki ishlar bo‘limiga kelib, bu haqda ma’lum qilgan.
Mazkur holat yuzasidan Jinoyat kodeksining 97-moddasi (qasddan odam o‘ldirish) 2-qismi “a” (ikki yoki undan ortiq shaxsni) hamda “v” (aybdorga ayon bo‘lgan ojiz ahvoldagi shaxsni o‘ldirish) bandlari bilan jinoyat ishi qo‘zg‘atildi. Gumonlanuvchi protsessual tartibda ushlangan.