Ўзбекистон – Хитой бизнес-форуми: эришилган келишувлар, янги лойиҳалар ва режалар 

Хитой Халқ Республикасининг қадимий пойтахти Сиан шаҳрида 17 май куни Ўзбекистон – Хитой бизнес-форуми бўлиб ўтди. Унда мамлакатимизнинг узоқ муддатли ҳамкорларидан ташқари, Ўзбекистон билан ҳамкорликни йўлга қўйишдан манфаатдор Хитойнинг 400 дан ортиқ йирик компаниялари ҳам иштирок этди.

Хитой ишбилармон доиралари вакиллари Ўзбекистонда ижобий таркибий ўзгаришлар ва бизнес юритиш учун яратилган қулай шароитлар билан атрофлича таништирилди. 

Ўзбекистон транспорт вазири форум якунлари бўйича фикрларини билдирар экан, Хитой билан ҳамкорликни ўзбекистонликлар аллақачон сезишни бошлаганини айтди.

“Республикамизда қурилаётган камида иккита йирик магистрал йўлларимизда Хитой компаниялари иштирок этишган. Бундан ташқари, темир йўл соҳасида поезд вагонларини ишлаб чиқариш бўйича ҳам муҳокамалар бўлмоқда. Бугунги кунда юк вагонларига эҳтиёжимиз мавжуд. Юк айланмаси ошгани сайин, вагонларга эҳтиёж бўлгани учун Хитойнинг йирик компанияси билан Ўзбекистонда қўшма корхона қилиб, юк вагонларини ишлаб чиқариш бўйича шартнома имзоладик”, — дейди у.

“БГИ Геномиcс” компанияси бош директори Жун Ченгнинг сўзларига кўра, компания Сирдарёдаги скрининг маркази фаолияти билан яқиндан танишган. 

“У ердаги эскирган тиббий ускуналарни янгиларига алмаштириш бўйича ўзаро ҳамкорлик режалари тузганмиз”, — дейди мутахассис.

Тадбир якунида энергетика, кимё, металлургия, енгил саноат, геология, транспорт, қишлоқ хўжалиги, таълим, фан, рақамли технологиялар, автомобилсозлик, электротехника, фармасевтика, туризм ва бошқа соҳаларда 20 га яқин икки томонлама ҳужжатлар имзоланди.

“Дарё” мазкур форумдан репортаж тайёрлади.