Америкага бориб яшамоқчи бўлганлар қандай синовларга дуч келади? АҚШда бир ой яшаш учун минимал ҳисобда қанча маблағ керак? 2001 йилдан буён Қўшма штатларда истиқомат қилаётган журналист, “Америка овози” телерадиоси мухбири Навбаҳор Имомова ушбу саволларга жавоб берди.
Навбаҳор Имомованинг айтишича, Америкада яшаш харажатлари юқори, айниқса, оилавий ҳаёт кечириш анча қимматга тушади.
“Вашингтон, Нью Йорк ёки бошқа қиммат шаҳарларда ҳар куни овқатлана олишингиз, ўзингизга қарашингиз учун ойига 1 500 доллардан 2 000 долларгача пул керак. Ва бу билан сиз камбағал ҳисобланасиз. Лекин оилангиз бўлса, бунча пул билан яшаш иложсиз. Американинг аксарият ҳудудларида сиз икки фарзандингиз билан бир хонали уйда яшай олмайсиз. Чунки бу ноқонуний ҳисобланади. Вашингтон ёки унга қўшни Балтимор шаҳрида икки фарзандингиз ва ўзингиз учун ижарага уй олмоқчи бўлсангиз, уни энг арзони, агар омадингиз чопса, 1 500—2 000 долларга топишингиз мумкин. Лекин гап анча хароб аҳволдаги квартира ҳақида кетмоқда. Яшаш учун осонроқ, қулайликлари бор жойлар ойига 3 000—3 500 долларгача боради. Тўрт аъзолик оилага ҳафтасига егулик учун 400—600 долларгача сарфлашга мажбур бўласиз”, — дейди журналист.
Навбаҳор Имомованинг айтишича, АҚШга янги борганлар йилига 40-50 минг доллар атрофида пул топиши мумкин. Аммо бу нисбий ҳисоб бўлиб, қандай натижаларга эришиш инсоннинг ҳаракати ва салоҳиятига боғлиқ.
“Америкага бормоқчи бўлганлар кўплаб синовларга тайёр бўлишлари керак. Муҳожирлик синовларига, ўзга юртда ҳаётни нолдан бошлашга ўзингизда куч топа олишингиз керак. АҚШга келганингизда чўнтагингизда озгина бўлса ҳам пулингиз бўлсин. Чунки бу ерда ҳеч кимдан қарз сўрай олмайсиз, қарз берадиганларни ҳам топиш қийин. Албатта, келиб, банк ҳисоби очиш мумкин. Банк хизматларидан фойдалана оласиз. Лекин у ердан кредит олиш учун ҳам ўзига хос молиявий тарих керак. Мен Америкада турли ёшдагиларни кўрдим. Нафақага чиқиб, бу ерга келиб, ҳаётини нолдан бошлаб, янги касб ўрганиб, тилни ҳам эплаб, янги бир турмуш бошлаганлар билан ҳам танишман. Шу билан бирга, ёш бўла туриб, йўлини топа олмай, яна Ўзбекистонга қайтиб кетганлар ҳам бор. Агар инсонда кучли ирода ва хоҳиш, тиришқоқлик, сабр ҳамда меҳнаткашлик бўлса, йўлини топиб кетиш эҳтимоли ниҳоятда катта. Агар сиз Ўзбекистонда ҳам ишини биладиган, ўқиган, ҳунарли бўлсангиз, бу ерга ҳам мослашиб кетишингиз осон кечади. Ҳунарли одам Америкада ҳам кўчада қолмайди. Инглиз тилида ҳеч бўлмаганда оддий, оз бўлса-да мулоқот қила оласизми, сизга иш топилади”, — дейди “Америка овози” мухбири.
Аввалроқ сайтимизда Навбаҳор Имомова билан Green Card, Америкада яшаш ва ишлашнинг ўзига хос жиҳатлари ҳақида суҳбат эълон қилинган.
Изоҳ (0)