Тошкент шаҳрида 12 май куни Ўзбекистон—Афғонистон—Покистон темир йўл линиясини қуриш лойиҳасини мувофиқлаштириш офисининг расмий очилиш маросими бўлиб ўтди.
Очилиш маросимида президентнинг Афғонистон бўйича махсус вакили Исматилла Эргашев, транспорт вазири Илҳом Маҳкамов, инвестисиялар, саноат ва савдо вазири маслаҳатчиси А.Хашимов, “Ўзбекистон темир йўллари” АЖ раисининг ўринбосари А.Камалов, Покистон элчиси А.Фарук, Афғонистон элчиси А.Илмий ва Афғонистон темир йўл бошқармаси раиси Б.Шарафат иштирок этишди.
Лойиҳа офисининг ташкил этилишидан мақсад, лойиҳанинг техник-иқтисодий асослашни ишлаб чиқиш ва амалий бажарилишини тезлаштириш бўйича қўшма чора-тадбирларни мувофиқлаштириш ҳисобланади.
Тадбир иштирокчилари лойиҳа офисининг ўз вақтида очилиши, томонларнинг лойиҳани амалга оширишни мунтазам равишда жадаллаштириш бўйича ҳаракатларини йўналтиришни алоҳида таъкидлади.
“Ўзбекистон Республикаси президентининг ташаббуси билан 2018 йилдан буён изчил самарали ишлар олиб борилмоқда, лойиҳа офисининг очилиши эса томонларнинг лойиҳани амалга оширишни жадаллаштириш борасидаги ҳаракатларининг навбатдаги босқичидир”, — деди Исматилла Эргашев.
“Лойиҳа қурилишини мувофиқлаштириш учун тўғридан тўғри Тошкент шаҳрида лойиҳа офисининг ўз вақтида очилиши Марказий Осиё мамлакатларини Покистоннинг 230 миллионли аҳолиси билан боғлайди, шунингдек, муқобил рақобатбардош йўналишларда Араб денгизи ҳавзаси давлатлари билан ўзаро савдо қилиш имкониятларини очади. Лойиҳани амалга ошириш минтақаларни юқори ривожланиш даражасига олиб чиқади, шунингдек, умумий тарихни ҳурмат қиладиган халқлар ўртасидаги муносабатларни тиклайди”, — дея таъкидлади Покистон элчиси.
“Тошкент шаҳрида лойиҳа офисининг очилиши томонлар мутахассисларининг ишини бевосита юзма-юз шаклда янада самарали ташкил этиш имконини беради, шунингдек, лойиҳани амалга оширишда Россия ва Марказий Осиёдан Жанубий Осиё мамлакатларига миллионлаб тонна табиий ресурс ва бошқа товарларни ташиш имконияти пайдо бўлади. Шу билан бирга, Афғонистон томони Афғонистон иқтисодиётининг реал секторини ривожлантиришга кўпроқ эътибор қаратаётган Ўзбекистонга ўз миннатдорчилигимни билдираман”, — дея таъкидлади Афғонистон темир йўл бошқармаси раиси Б.Шарафат.
11–12 май кунлари Ўзбекистон—Афғонистон—Покистон темир йўл линиясини қуриш лойиҳасини янада ривожлантириш бўйича навбатдаги уч томонлама музокаралар бўлиб ўтди. Унда томонлар лойиҳани амалга оширишни жадаллаштириш билан боғлиқ масалаларни муҳокама қилган.
Изоҳ (0)