Ukraina Qurolli kuchlariga mamlakat sharqida qarshi hujumga tayyorgarlik ko‘rish uchun biroz ko‘proq vaqt kerak. Bu haqda Ukraina prezidenti Vladimir Zelenskiy Yevropa OAVlariga bergan intervyusida ma’lum qildi.
Zelenskiy, shuningdek, AQSHdagi navbatdagi prezidentlik saylovlari oldidan Ukrainaning Rossiya ustidan g‘alaba qozonishiga ishonishini aytdi.
“Biz oldinga siljishni boshlashimiz va muvaffaqiyatga erishishimiz mumkin. Biroq, biz bu yo‘lda juda ko‘p odamlarni yo‘qotamiz. Men buni nomaqbul deb bilaman. Shuning uchun biz kutishimiz kerak. Bizga hali biroz ko‘proq vaqt kerak”, — dedi Zelenskiy.
Vladimir Zelenskiy Ukraina harbiylari jangovar harakatlarga to‘liq tayyor ekanini aytdi. Shu bilan birga, uning so‘zlariga ko‘ra, ularda “ba’zi narsalar”, jumladan, zirhli texnika yetishmaydi.
Jo Bayden prezident saylovida mag‘lubiyatga uchragan taqdirda Ukraina AQSH qo‘llab-quvvatlashini yo‘qotishi mumkinligi haqidagi savolga Vladimir Zelenskiy o‘sha vaqtgacha urushda g‘alaba qozonishga ishonishini aytdi.
“Kim biladi, biz qayerda bo‘lamiz? O‘shangacha g‘alaba qozonishimizga ishonaman”, — dedi u.
AQSHda saylovlar 2024-yil 5-noyabrda bo‘lib o‘tishi rejalashtirilgan.
Izoh (0)