Россия Мудофаа вазирлиги мамлакат армиясининг жанговар ҳаракатлар олиб борилаётган нуқталардаги “мудофааси ёриб ўтилгани” ҳақидаги хабарлар ҳақиқатга тўғри келмаслигини маълум қилди.
Ҳарбий идорага кўра, ҳарбий операция ўтказилаётган ҳудуддаги умумий вазият назорат остида. Таъкидланишича, Запорожье ва Херсон, шунингдек, Купянск йўналишларида “фаол ҳаракатлари олиб борилмаяпти”.
“Айни вақтда Украина Қуролли кучларининг ‘Малоилиновка’ аҳоли пункти йўналишидаги ҳужумини қайтариш бўйича жанглар олиб бориляпти. Армия ва штурм авиацияси, шунингдек, артиллерия ишга туширилган. Душман ҳам жон, ҳам техника борасида катта йўқотишларга учрамоқда”, — дейилади Мудофаа вазирлиги пресс-релизида.
Ғарб давлатлари Украина яқин вақтларда қарши ҳужумга ўтишини кутмоқда. Бироқ Буюк Британиянинг ҳисоблашича, у можарони ҳал этишга хизмат қилмайди. 9 май куни АҚШ давлат котиби Энтони Блинкен Киев қарши ҳужум учун керакли барча нарсани олганини маълум қилди. Украина ТИВ раҳбари Дмитрий Кулеба Киев қарши ҳужумда муваффақиятга учрамаса, яна битта ҳужум бўлишини айтди.
Украина президенти Владимир Зеленский Европа ОАВларига берган интервьюсида Украина Қуролли кучларига мамлакат шарқида қарши ҳужумга тайёргарлик кўриш учун бир оз кўпроқ вақт кераклигини маълум қилганди.
Изоҳ (0)