O‘zbek kino ixlosmandlari komik aktyor Shuhrat Nuraliyevni yaxshi eslashadi. U faoliyati davomida “Muhabbat sinovlari”, “Osmondagi bolalar”, “Sevginator-2” kabi filmlarda o‘ziga xos rollarni ijro etgan. Afsuski, aktyor hayotni juda erta, 37 yoshida tark etgan. 9-may — Xotira va qadrlash kuni munosabati bilan “Daryo” Shuhrat Nuraliyevning oila a’zolari va uni yaqindan bilgan hamkasblari bilan suhbat tashkillashtirdi.
— Oilada uch o‘g‘il farzand bo‘lganmiz, akam rahmatli to‘ng‘ichimiz edi. Bolalikdan otasizlik sabab ko‘plab qiyinchiliklarni boshdan kechirganmiz. Uyda onam bilan buvim somsa tayyorlashar, akam esa ularni vokzal yaqinidagi bozorchada sotib kelardi. Akamda san’atga bo‘lgan qiziqish bozorda paydo bo‘lgan desam mubolag‘a bo‘lmaydi. Chunki hazil-huzul qilib odamlarning e’tiborini tortishga harakat qilardi. Akam bolalikdan san’atga qiziqqan, ammo onam rahmatli bu kasbni tanlashiga qarshilik qilgan. Sarviniso buvim esa bu borada akamni qo‘llab-quvvatlab, san’at institutiga ham yetaklab borgan. Hatto, institutga hujjat topshiriladigan kun ham onam akamga “Sendan san’atkor chiqmaydi”, deb kuzatgan edi, — deydi marhumning ukasi Davron Nuraliyev.
Shuhrat Nuraliyev bolalikdan tug‘ma yurak xastaligi bilan og‘rigan.
— Akam bolalikdan tug‘ma yurak porogi kasalligi bilan og‘rirdi. Onam bu haqda ko‘p aytardi, ammo akam “Yaxshiman, havotir olmang”, deb e’tibor bermasdi. Keyinchalik qon bosimi ham tez-tez oshadigan bo‘lib qoldi. Bir kuni “Uch kunlik” dunyo spektaklini televideniye uchun syomka qiladigan bo‘lishdi. Akam bosh rolni ijro etardi. Ammo qon bosimi ko‘tarilib ketgani uchun “Tez yordam” mashinasida kelgan shifokorlar uni sahnaga chiqarishni istashmadi. Akam esa muxlislarni ranjitmaslik uchun muolajani olib sahnaga chiqib ketavergan. Tobi bo‘lmasa ham sahnada sezdirmaslikka harakat qilgan. Speaktakl yakunidan keyin akamni tibbiy tekshiruvga olib ketishgan va mikroinfarktni boshdan kechirganini aytishgan. Undan keyin akamning qand kasalligi ham bor edi. Bu xastalik bilan oilaviy og‘riymiz, — deydi Davron Nuraliyev.
Davron Nuraliyev akasi bilan yo‘l-transport hodisasiga uchragani va ayb ularda bo‘lmasa-da, akasi ularga kelib urilgan mashina haydovchisini rozi qilgani haqida so‘zlab berdi.
— Akam menga yangi “Matiz” mashinasini olib bergan paytda svetoforning qizil chirog‘idan “Jiguli” avtomobili kelib urilgan. Akam o‘tirgan tomonni urgani uchun qo‘rqib ketganman. Akam o‘ziga biroz kelganidan keyin mashinadan tushgan. U paytda men haydovchi bilan urishayotgan edim. Akam meni tinchlantirib, “Jiguli” egasiga 200 dollar bergan va mashinasini sozlab olishini aytgan. Jig‘ibiyronim chiqib buning sababini so‘raganimda “Ko‘rib turibsan-ku, qiynalgan yigit ekan. Biz ham shunday qiyin kunlarni boshdan kechirganmiz-ku”, degandi. Akamning janozasiga o‘sha yigit ham kelibdi, o‘zini tanishtirganida ko‘rib xursand bo‘ldim. Chunki moliyaviy ahvoli ancha yaxshilanib, o‘zini o‘nglab olibdi. Akam saxiy inson edi, qiyin kunlarimizni ko‘p eslardi. Birov pul so‘rab kelsa oxirgi pulini ham berib yuborardi. “Bersam Alloh menga beradi”, deb ko‘p aytardi, — deydi marhum aktyorning ukasi Davron Nuraliyev.
Suhbatni quyidagi havola orqali to‘liq holda tomosha qilishingiz mumkin.
Eslatib o‘tamiz, Shuhrat Nuraliyev 1980-yilning 5-noyabr kuni Toshkent shahrida tavallud topgan. U sobiq Mannon Uyg‘ur nomidagi Toshkent davlat san’at institutini tamomlagan. Kino aktyorligidan tashqari, O‘zbek Milliy akademik drama teatrida ham faoliyat yuritgan. Vafotidan avval esa O‘zbekiston xalq artisti Yulduz Usmonovaning jamoasida rahbar va rejissor vazifasida ishlagan. Shuhrat Nuraliyev Nilufar Usmonovaning “Asraydi”, “Kel ikkimiz” kabi xit qo‘shiqlari muallifi hisoblanadi. Shuningdek, u Yulduz Usmonovaning bir necha qo‘shiqlariga kliplar suratga olgan.
Izoh (0)