Ўзбек кино ихлосмандлари комик актёр Шуҳрат Нуралиевни яхши эслашади. У фаолияти давомида “Муҳаббат синовлари”, “Осмондаги болалар”, “Севгинатор-2” каби фильмларда ўзига хос ролларни ижро этган. Афсуски, актёр ҳаётни жуда эрта, 37 ёшида тарк этган. 9 май — Хотира ва қадрлаш куни муносабати билан “Дарё” Шуҳрат Нуралиевнинг оила аъзолари ва уни яқиндан билган ҳамкасблари билан суҳбат ташкиллаштирди.
— Оилада уч ўғил фарзанд бўлганмиз, акам раҳматли тўнғичимиз эди. Болаликдан отасизлик сабаб кўплаб қийинчиликларни бошдан кечирганмиз. Уйда онам билан бувим сомса тайёрлашар, акам эса уларни вокзал яқинидаги бозорчада сотиб келарди. Акамда санъатга бўлган қизиқиш бозорда пайдо бўлган десам муболаға бўлмайди. Чунки ҳазил-ҳузул қилиб одамларнинг эътиборини тортишга ҳаракат қиларди. Акам болаликдан санъатга қизиққан, аммо онам раҳматли бу касбни танлашига қаршилик қилган. Сарвинисо бувим эса бу борада акамни қўллаб-қувватлаб, санъат институтига ҳам етаклаб борган. Ҳатто, институтга ҳужжат топшириладиган кун ҳам онам акамга “Сендан санъаткор чиқмайди”, деб кузатган эди, — дейди марҳумнинг укаси Даврон Нуралиев.
Шуҳрат Нуралиев болаликдан туғма юрак хасталиги билан оғриган.
— Акам болаликдан туғма юрак пороги касаллиги билан оғрирди. Онам бу ҳақда кўп айтарди, аммо акам “Яхшиман, ҳавотир олманг”, деб эътибор бермасди. Кейинчалик қон босими ҳам тез-тез ошадиган бўлиб қолди. Бир куни “Уч кунлик” дунё спектаклини телевидение учун сёмка қиладиган бўлишди. Акам бош ролни ижро этарди. Аммо қон босими кўтарилиб кетгани учун “Тез ёрдам” машинасида келган шифокорлар уни саҳнага чиқаришни исташмади. Акам эса мухлисларни ранжитмаслик учун муолажани олиб саҳнага чиқиб кетаверган. Тоби бўлмаса ҳам саҳнада сездирмасликка ҳаракат қилган. Спеактакл якунидан кейин акамни тиббий текширувга олиб кетишган ва микроинфарктни бошдан кечирганини айтишган. Ундан кейин акамнинг қанд касаллиги ҳам бор эди. Бу хасталик билан оилавий оғриймиз, — дейди Даврон Нуралиев.
Даврон Нуралиев акаси билан йўл-транспорт ҳодисасига учрагани ва айб уларда бўлмаса-да, акаси уларга келиб урилган машина ҳайдовчисини рози қилгани ҳақида сўзлаб берди.
— Акам менга янги “Matiz” машинасини олиб берган пайтда светофорнинг қизил чироғидан “Жигули” автомобили келиб урилган. Акам ўтирган томонни ургани учун қўрқиб кетганман. Акам ўзига бир оз келганидан кейин машинадан тушган. У пайтда мен ҳайдовчи билан уришаётган эдим. Акам мени тинчлантириб, “Жигули” эгасига 200 доллар берган ва машинасини созлаб олишини айтган. Жиғибийроним чиқиб бунинг сабабини сўраганимда “Кўриб турибсан-ку, қийналган йигит экан. Биз ҳам шундай қийин кунларни бошдан кечирганмиз-ку”, деганди. Акамнинг жанозасига ўша йигит ҳам келибди, ўзини таништирганида кўриб хурсанд бўлдим. Чунки молиявий аҳволи анча яхшиланиб, ўзини ўнглаб олибди. Акам сахий инсон эди, қийин кунларимизни кўп эсларди. Биров пул сўраб келса охирги пулини ҳам бериб юборарди. “Берсам Аллоҳ менга беради”, деб кўп айтарди, — дейди марҳум актёрнинг укаси Даврон Нуралиев.
Суҳбатни қуйидаги ҳавола орқали тўлиқ ҳолда томоша қилишингиз мумкин.
Эслатиб ўтамиз, Шуҳрат Нуралиев 1980 йилнинг 5 ноябрь куни Тошкент шаҳрида таваллуд топган. У собиқ Маннон Уйғур номидаги Тошкент давлат санъат институтини тамомлаган. Кино актёрлигидан ташқари, Ўзбек Миллий академик драма театрида ҳам фаолият юритган. Вафотидан аввал эса Ўзбекистон халқ артисти Юлдуз Усмонованинг жамоасида раҳбар ва режиссёр вазифасида ишлаган. Шуҳрат Нуралиев Нилуфар Усмонованинг “Асрайди”, “Кел иккимиз” каби хит қўшиқлари муаллифи ҳисобланади. Шунингдек, у Юлдуз Усмонованинг бир неча қўшиқларига клиплар суратга олган.
Изоҳ (0)