Уйини сел босган ногирон фуқаро ҳокимиятдан ёрдам сўради. Ҳокимлик одатда ўз зиммасида бундай мажбурият йўқлигини айтмоқда

Қашқадарё вилоятининг Китоб туманида яшовчи фуқаро Ҳабибулла Мадиев “Дарё”га мурожаат қилиб, 2022 йилнинг ноябрь ойида уйини сел суви босганини, анча зарар кўргани сабаб ногиронлигини айтиб, туман ҳокимидан нажот сўраб боргач, ҳоким ёрдам беришни ваъда қилганига қарамай, ваъдасини бажармаганини айтмоқда.

“2022 йилнинг 4 ноябрь куни Китоб туманининг Юқори Аёқчи қишлоғига сел келиб, менинг уйимни, томорқамни лойқа, тош ва ахлатга тўлдириб ташлади. Шундан сўнг 10 ноябрь куни халқ қабулхонасига мурожаат қилиб, ёрдам сўрадим. Одам боради ва ўрганиб чиқиб, хулоса қилинади, дейишганди. Лекин ҳеч ким бормади.

17 ноябрь куни яна Халқ қабулхонасига мурожаат қилдим. Қабулда шахсан ҳокимнинг ўзи мени қабул қилиб, мутахассиларни жўнатамиз, бориб ўрганади, деди. Шундан сўнг ҳам ҳеч ким бормади. 24 ноябрь куни такроран яна ҳокимга мурожаат қилдим. Ҳоким яна қайта-қайта мурожаат қилсанг, бир оғиз гапирсанг, лавозимдан қайтаман, хонамдан чиқариб юбораман, деди.

Қабулдан сўнг, эртаси куни 25 ноябрь куни Баҳодир Тўраев бошчилигида масъуллар уйимга келиб, вазиятни ўрганишди. Блок ғишт, 20 дона шифер, стропила берамиз, шунингдек, 4 сотих ер ажратиб, уй қуриб берамиз деб кетишди. Лекин шу пайтгача ҳеч қандай натижа бўлмади”, — дейди иккинчи гуруҳ ногирони эканини айтган фуқаро.

Фуқаронинг айтишича, ҳоким ваъда бериб, ваъдасини бажармагач, бу ҳақда жамоатчиликка мурожаат қилишга мажбур бўлган.

“Ҳокимнинг шахсан ўзи ваъда берганди. Бўлди, ҳамма жойга мурожаат қилиш шарт эмас. Ваъда бердим, қилиб берамиз дегач, ҳокимга ишонгандим. Лекин ваъда ваъдалигича қолиб кетди”, — дейди у.

“Дарё”нинг бу ҳақдаги сўровига жавоб берган Китоб тумани ҳокимлиги ахборот хизмати раҳбари Қаҳрамон Оқилов одатда ҳокимлик бундай ишларни ҳомийлар кўмаги ёрдамида амалга оширишини, ҳокимиятда уйини сел босган фуқаронинг уй-жойини таъмирлаб бериш мажбурияти йўқлигини айтмоқда.

“Аҳолининг уй-жойига талафот етказилганида ҳокимликнинг моддий ёрдам кўрсатиши қатъий белгиланмаган. Лекин инсонпарварлик жиҳатидан олиб қаралганда, кенгаш қарори орқали ёрдам кўрсатилиши мумкин. Шунда ҳам уйнинг кадастр ҳужжати бўлса. Агарда уй ўз номида бўлмаса, ҳеч қандай ёрдам ололмайди”, — дейди Қаҳрамон Оқилов.