O‘zbekistonning ikki hududi Navoiy va samarqand viloyatlarida gaz va svetdan noqonuniy foydalanganlar 289 million so‘m zarar yetkazdi. Bu haqda Iqtisodiy jinoyatlarga qarshi kurashish departamenti axborot xizmati xabar berdi.
Xabarga ko‘ra, Bosh prokuratura huzuridagi departamentning Nurobod va Narpay tuman bo‘limlari tomonidan o‘tkazilgan tergovga qadar tekshiruvlarda, “A.E.” MCHJ va “B.P.” fermer xo‘jaligi masʼul shaxslari artizan qudug‘i va suv nasosini hech qanday hujjatsiz umumiy foydalanishdagi elektr tarmoqlariga o‘zboshimchalik bilan ulagani aniqlangan. Ular 308,5 ming kVt/s elektr energiyasidan noqonuniy foydalangan.
Shu kabi, departamentning Karmana tuman bo‘limi tomonidan o‘tkazilgan tergovga qadar tekshiruvlarda, “K.I.” va “F.P.” oilaviy korxonalari masʼul shaxslari ushbu korxonalarga qarashli umumiy ovqatlanish shoxobchalarini hech qanday hujjatsiz umumiy foydalanishdagi gaz tarmoqlariga o‘zboshimchalik bilan ulab, 150 ming kub tabiiy gazdan noqonuniy foydalangani aniqlangan.
Ushbu qonunbuzilish holatlari oqibatida davlat va jamiyat manfaatlariga 289 million so‘m zarar yetkazilgan.
Mazkur holatlar yuzasidan Jinoyat kodeksining 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)