Ўзбекистонда вилоят ва туман даражасида ҳам бошқарув сифатини ошириш вазифаси турибди. Бу ҳақда Шавкат Мирзиёев Олий Мажлис палаталари, сиёсий партиялар, суд ва ижро этувчи ҳокимият органлари раҳбарлари ҳамда жамоатчилик фаоллари билан референдум якунларига бағишланган учрашувда айтиб ўтди.
Президент Ўзбекистон демократик тараққиёт йўлини қатъий давом эттиришини, Конституцияда бу мақсадга эришиш кафолатлари янада кучайтирилишини таъкидлади.
“Бизга инсон ва бизнеснинг оғирини енгил қиладиган, уларга сифатли хизмат кўрсатадиган ихчам ва самарали бошқарув тизими керак. Маъмурий ислоҳотларни айнан шу мақсадда бошладик. Биринчи босқичда ҳукумат ва вазирликлар ихчам қилиниб, уларнинг иш услуби ўзгартирилди.
Навбатдаги вазифамиз вилоят ва туман даражасида ҳам бошқарув сифатини оширишдан иборат. Менинг энг катта ниятим — одамларни қийнаётган муаммоларни маҳалланинг ўзи ечадиган халқчил тизим яратиш”, — деди давлат раҳбари.
Шу сабабли, молия, солиқ, бандлик каби идораларнинг камида 30 фоиз ваколатларини маҳалла даражасига тушириш режа қилинган.
Давлат раҳбари муаммоларнинг ёритилишида ОАВнинг ўрнини ҳам эътироф этди. Президент бугунги кунда халқ овози ва фикрини кенг жамоатчилик ва давлат идоралари эътиборига олиб чиқаётган энг таъсирчан куч, бу — оммавий ахборот воситалари ва журналистлар экани таъкидлади.
“Жамиятимиздаги очиқлик сиёсатини изчил давом эттириш мақсадида оммавий ахборот воситалари фаолиятининг эркинлиги, ахборот олиш, фойдаланиш ва тарқатишга бўлган ҳуқуқлар қатъий кафолатланмоқда.
Шу билан бирга, сўз эркинлиги бу — масъулият ҳам дегани. Яъни, ахборот маконида ҳаққонийлик ва холислик бош мезон эканини ҳам унутмаслигимиз зарур”, — деди давлат раҳбари.
Изоҳ (0)