68 yoshli Bryus Uillisning salomatligi yomonlashgani haqidagi xabar muxlislarni hayratda qoldirishda davom etmoqda. Dahshatli tashxislarga qaramay, birinchi navbatda oilasiga g‘amxo‘rlik qilishga qaror qilgan yulduzlar haqida ma’lumot beramiz.
Bryus Uillis
Tashxis — afaziya
Shifokorlar Bryus Uillisga afaziya tashxisini qo‘ygani ma‘lum bo‘lgach, uning atrofidagi shovqin (2021-yilda Bryus Uillisga alohida nominatsiya — “Bryus Uillisning eng yomon ijrosi” bo‘yicha “Oltin malina” berilgandi) bir zumda tindi. Gollivud sarosimaga tushib qoldi va “Oltin malina”ni bekor qildi. Xijolat bo‘lgan tanqidchilar ko‘z oldilaridagi fojia ekrandagi film voqealari emasligini birdan anglab yetdilar.
Bryus Uillisning 2012-yildan boshlab taniqli amerikalik prodyuser Rendall Emmett bilan hamkorlik qilishining sababini ko‘pchilik tushundi. Rendall filmlarini o‘ta qisqa vaqtda, ijodiy yangiliklarsiz suratga olgan va ular hech qachon durdona asarlar toifasiga kirmagan. Ammo aktyorga pul kerak edi, kadrda juda kam ko‘ringan bo‘lsa-da, Bryus 3-4 million dollar gonorar oladi. Aytgancha, Al Pachino, Nikolas Keyj va boshqa Gollivud yulduzlari ham oson topiladigan pul ilinjida Emmett xizmatiga tez-tez murojaat qilishgan. Afsuski, Rendallning filmlarida Bryus Uillis naushnik taqib rol o‘ynaydi: u matnni to‘liq eslay olmasdi va bundan juda asabiylashardi.
“U demensiyaga chalingan. U bilan to‘rtta film ustida ishladim. Afsonaviy aktyorning ko‘z o‘ngimizda so‘nayotganini ko‘rish juda achinarli. Men buni so‘nggi bir necha yildan beri ko‘ryapman”, — deydi aktyor bilan birga ishlagan rejissor Mett Eskandari.
Kasallik tez rivojlanardi va Bryus Uillis oilasini ta’minlashga shoshib qoldi. U rafiqasi Emma Xeming va ikki nafar yosh qizi kelajakda moddiy qiyinchiliklarni boshdan kechirishini istamadi. Shuning uchun Bryus shoshilinch ravishda ko‘chmas mulkini sotdi va shon-shuhratiga qo‘l siltab, saviyasi past filmlarda rol o‘ynay boshladi.
Bryus Uillis aktyorlik faoliyatini yakunlaganini e’lon qilganida ko‘pchilikning qalbi bo‘shab qoldi. Shundan so‘ng u har bir kunini qarindoshlari va yaqinlari davrasida o‘tkazadi, tez orada kunlarning hisobini yo‘qotadi va kasallik uning xotirasini parchalayotganini his qiladi.
Ammo Bryusga oilasi kuchli tayanch bo‘ldi. Sobiq rafiqasi Demi Mur ajrashganiga qaramay, Uillis hayotida doimo muhim o‘rin egallagan.
“Barcha muxlislarga shuni ma’lum qilamizki, sevimli Bryusimiz sog‘lig‘ida muammolarga duch kelgan va yaqinda unga kognitiv qobiliyatiga ta’sir qiluvchi afaziya tashxisi qo‘yilgan. Shu sababli Bryus o‘zi uchun juda muhim bo‘lgan karyerasidan voz kechmoqda. Hozir oilamiz uchun juda qiyin davr, biz doimiy sevgingiz, hamdardligingiz va qo‘llab-quvvatlaganingiz uchun juda minnatdormiz. Butun oilamiz bilan buni boshdan kechirmoqdamiz va bu haqda uning muxlislariga xabar berishni xohladik. Biz uning siz uchun qanchalik muhimligini va siz u uchun qanchalik muhimligingizni bilamiz”, — degan Demi muxlislarga murojaat qilib.
Robin Uilyams
Tashxis: Parkinson kasalligi
Robin o‘zining oqko‘ngilligi, soddaligi bilan boshqa Gollivud yulduzlaridan farq qilardi. Uning samimiy tabassumida biroz qayg‘u yashiringandi. U hech qachon hech kim bilan janjallashmagan va bunga toqati ham yo‘q edi. Robin hatto bu haqda shunday hazil ham qiladi: “Hech qachon xunuk odamlar bilan urishmang. Ularning yo‘qotadigan hech narsasi yo‘q”.
Shon-shuhratiga qaramay, Robin Uilyams o‘zini vakuumda yashayotgandek his qildi. Bolaligidan to‘kin-sochinlikda, hech narsaga muhtojligini bilmay o‘sgan bo‘lsa-da, ota-ona e’tiboridan, mehridan mahrum, yolg‘izlik tuyg‘usi qalbida bir umr saqlanib qoldi. Buyuk komediyachi, ayniqsa, ayollar bilan munosabatlarda mukammal emasdi. Uchta nikoh, doimiy xiyonat, albatta, uning beqarorligidan dalolat beradi. Biroq Robin tanlaganlarini chin dildan va mehr bilan sevdi, bolalariga ehtiyotkorlik va g‘amxo‘rlik bilan munosabatda bo‘ldi. Robin o‘zini ayamasdi — hamma uchun kerakli bo‘lishga intilib, barchaga yordam berdi.
“O‘zing yordamga muhtojligingni tan olish juda qiyin, lekin buni tan olganingda osonroq bo‘ladi”, — deydi Robin.
Shifokorlar unga Parkinson kasalligi tashxisini qo‘yishganda aktyor sezilarli darajada sarosimaga tushadi, keyin esa shoshiladi. Kelajakda farovon yashashi uchun uch nafar farzandiga jamg‘arma tuzadi. U o‘zining hashamatli saroyini 30 million dollardan ko‘proqqa sotishga harakat qiladi, ammo ulgurmaydi. Kasallik o‘z ta’sirini o‘tkazadi — uning ruhiyatini asta-sekin yo‘q qiladi, u asabiylashadi, hamma narsa qo‘lidan tushib ketaveradi. Ta'sirchan, nozik, zaif qalb bilan Robin o‘zini oldingi hayotidan tashqarida tasavvur qila olmaydi va yangi, yaqinlashib kelayotgan og‘riqli hayot uni ezadi. 63 yoshida hamshira nazorati ostida “sabzavot” bo‘lib, ma’nosiz nigohlari bilan atrofga qarab, hech kimni tanimaydi. Robin Uilyams 2014-yil 11-avgust kuni o‘z joniga qasd qiladi.
“Men o‘lsam, qabrim ustida iching, raqsga tushing — xohlaganingizni qiling. Faqat meni klonlashtirmang, chunki klonim hech qachon mendek bo‘lolmaydi”, — deya hazil qilgandi mashhur aktyor.
Selma Bler
Tashxis — tarqoq ateroskleroz
“Shafqatsiz o‘yin” filmi yulduzi Selma Blerning so‘zlariga ko‘ra, u dastlab taqdir tomonidan siylangan. U badavlat oilada tug‘ilgan, hamma uni yaxshi ko‘rgan va erkalab suygan. O‘z maqsadiga erishish — orzu qilingan Gollivudga kirish uchun nazokatli va jozibali qiz o‘zini ortiqcha urintirmaydi. Selmaning ijodiy faoliyati juda muvaffaqiyatli bo‘ldi, u 70 ta filmda rol o‘ynadi va izlanuvchan aktrisalardan biri sifatida tan olindi. Uning dizayner Jeyson Blik bilan ishqiy munosabatlari 2011-yilda o‘g‘li Arturni dunyoga keltirishi bilan yakunlandi. Albatta, Selma Blerning onalik baxtining cheki yo‘q edi.
Biroq aktrisaning quvonchiga shifokorga navbatdagi tashrifi soya soladi. Gap shundaki, Selma ko‘p yillar davomida mushak og‘rig‘idan azob chekkan, doimiy zaiflik uni tom ma’noda yiqitdi. Bu safar tashxis aniq va shubhasiz bo‘ldi: shifokorlar Gollivud yulduzida tarqoq ateroskleroz borligini aniqlaydilar.
“Kasallik simptomlari anchadan beri bor edi, — deydi Selma. — Buni jiddiy qabul qilmadim. Hammasi og‘riqqa chidolmay, davolanish uchun shifokorga borganimda boshlandi. Keyin esa so‘nggi 15 yil davomida haqiqiy kasallik alomatlariga ko‘z yumganimni angladim. Nihoyat sog‘lig‘im bilan bog‘liq vaziyatga oydinlik kiritganimdan xursandman”.
Shundan keyin Selma Blerning hayoti kasallik bilan og‘ir, mashaqqatli kurashga aylanadi.
“
Menga o‘lim holatiga rejalar tuzishni maslahat berishdi. Menda skleroz borligi uchun emas, balki unga qarshi kurashayotganim uchun”.
Ammo u boshiga tushgan sinovlarga taslim bo‘lmadi, chunki uning yonida dunyodagi eng aziz odami — o‘g‘li Artur bor. Aynan Artur uchun, uning kelajagi uchun Selma bor kuchi bilan ishlashga harakat qildi va bu qanchalik qiyinligini unga bildirmadi. O‘tgan yilning oktabr oyida Gollivud yulduzi Reychel Fleyt rejissor bo‘lgan hujjatli filmni taqdim etdi, unda aktrisa boshidan kechirgan iztiroblari haqida gapirdi. U taqdimot marosimida taqdir zarbalari ostida sinmagan, yuzida shirin tabassum bilan qo‘ltiqtayoqda sahnaga chiqdi. Mehmonlar uni qarsaklar bilan kutib olishdi, bu g‘ayrioddiy ayolning jasoratiga qoyil qolishdi.
Selma Bler o‘zining eski hayotini davom ettirish uchun kurashmoqda. Bir marta u o‘g‘li Artur bilan birga fotosessiya ham uyushtirdi: ikkalasi ham eng yaxshi moda uylarining liboslarida suratga tushdi. Selmaning aytishicha, o‘g‘lini unga o‘xshatishsa, o‘zida yo‘q quvonadi.
Izoh (0)