O‘zbekistonning Fransiya bilan o‘zaro savdo hajmi 2023-yilda uch barobar ko‘paydi. Bu haqda Investitsiyalar, sanoat va savdo vazirligi axborot xizmati xabar berdi.
Xabarga ko‘ra, 5-may kuni Toshkent shahrida investitsiyalar, sanoat va savdo vaziri Laziz Kudratov hamda Fransiya tashqi savdo, iqtisodiy jozibadorlik va chet eldagi fuqarolar ishlari bo‘yicha delegat vaziri Oliver Besht raisligida Savdo-iqtisodiy hamkorlik bo‘yicha O‘zbekiston-Fransiya hukumatlararo komissiyasining 9-yig‘ilishi bo‘lib o‘tdi. Unda ikki mamlakatning tegishli vazirlik va idoralari, tarmoq birlashmalari rahbarlari, ishbilarmon doiralari vakillari ham ishtirok etdi.
Yig‘ilishda savdo-iqtisodiy, investitsiyaviy, sanoat va madaniy-gumanitar sohalardagi hamkorlikni yanada rivojlantirish masalalari muhokama qilindi. Hukumatlararo muloqot doirasida tovar ayirboshlash hajmi o‘sishining ijobiy tendensiyasi qayd etildi.
Shuningdek, GSP+ benefitsiari maqomi tufayli 2022-yilda Fransiyaga yuborilgan eksport qariyb 3,5 baravarga o‘sdi, joriy yilda esa o‘zaro savdo hajmi 3 barobar ko‘paydi. Shu bilan birga, ikki tomonlama savdoni kengaytirish va diversifikatsiya qilish borasida mavjud resurslarni safarbar etish zarurligiga eʼtibor qaratildi. Savdo to‘siqlarini bartaraf etish, savdo uylarini ochish, o‘zaro ko‘rgazma va yarmarkalar tashkil etish, ikki tomonlama savdoni rivojlantirish bo‘yicha o‘rta muddatli dasturni tasdiqlash yuzasidan chora-tadbirlar ko‘rish taklif etildi.
Yig‘ilish kun tartibi doirasida bank-moliya va turizm sohalarida ham sheriklikni rivojlantirish istiqbollari ko‘rib chiqildi. Yig‘ilish yakunlari bo‘yicha HK yig‘ilishining yakuniy bayonnomasi, Chimyonda umummavsumiy turistik markazini rivojlantirish bo‘yicha hamkorlik to‘g‘risidagi bitim, Qashqadaryo viloyati ichimlik suvi taʼminoti tizimini modernizatsiya qilish va Yakkabog‘ shahrida magistral suv quvurlari qurilishi bo‘yicha O‘zaro anglashuv memorandumi, To‘qimachilik sanoatini rivojlantirish bo‘yicha hamkorlik to‘g‘risidagi bitim, shuningdek, “Chimyon turistik zonasini qurish” xalqaro umummavsumiy kurort loyihasi doirasida shartnoma imzolandi.
Izoh (0)