Ўзбекистоннинг Франция билан ўзаро савдо ҳажми 2023 йилда уч баробар кўпайди. Бу ҳақда Инвестициялар, саноат ва савдо вазирлиги ахборот хизмати хабар берди.
Хабарга кўра, 5 май куни Тошкент шаҳрида инвестициялар, саноат ва савдо вазири Лазиз Кудратов ҳамда Франция ташқи савдо, иқтисодий жозибадорлик ва чет элдаги фуқаролар ишлари бўйича делегат вазири Оliveр Бешт раислигида Савдо-иқтисодий ҳамкорлик бўйича Ўзбекистон-Франция ҳукуматлараро комиссиясининг 9-йиғилиши бўлиб ўтди. Унда икки мамлакатнинг тегишли вазирлик ва идоралари, тармоқ бирлашмалари раҳбарлари, ишбилармон доиралари вакиллари ҳам иштирок этди.
Йиғилишда савдо-иқтисодий, инвестициявий, саноат ва маданий-гуманитар соҳалардаги ҳамкорликни янада ривожлантириш масалалари муҳокама қилинди. Ҳукуматлараро мулоқот доирасида товар айирбошлаш ҳажми ўсишининг ижобий тенденцияси қайд этилди.
Шунингдек, GSP+ бенефициари мақоми туфайли 2022 йилда Францияга юборилган экспорт қарийб 3,5 бараварга ўсди, жорий йилда эса ўзаро савдо ҳажми 3 баробар кўпайди. Шу билан бирга, икки томонлама савдони кенгайтириш ва диверсификация қилиш борасида мавжуд ресурсларни сафарбар этиш зарурлигига эътибор қаратилди. Савдо тўсиқларини бартараф этиш, савдо уйларини очиш, ўзаро кўргазма ва ярмаркалар ташкил этиш, икки томонлама савдони ривожлантириш бўйича ўрта муддатли дастурни тасдиқлаш юзасидан чора-тадбирлар кўриш таклиф этилди.
Йиғилиш кун тартиби доирасида банк-молия ва туризм соҳаларида ҳам шерикликни ривожлантириш истиқболлари кўриб чиқилди. Йиғилиш якунлари бўйича ҲК йиғилишининг якуний баённомаси, Чимёнда умуммавсумий туристик марказини ривожлантириш бўйича ҳамкорлик тўғрисидаги битим, Қашқадарё вилояти ичимлик суви таъминоти тизимини модернизация қилиш ва Яккабоғ шаҳрида магистрал сув қувурлари қурилиши бўйича Ўзаро англашув меморандуми, Тўқимачилик саноатини ривожлантириш бўйича ҳамкорлик тўғрисидаги битим, шунингдек, “Чимён туристик зонасини қуриш” халқаро умуммавсумий курорт лойиҳаси доирасида шартнома имзоланди.
Изоҳ (0)