Kremlga uyushtirilgan tungi hujum, ehtimol, qurollangan “mahalliy qarshilik kuchlari” tomonidan uyushtirilgan. Bu haqda Ukraina prezidenti ofisi rahbari maslahatchisi Mixail Podolyak ma’lum qildi.
“Kreml uzra uchuvchisiz uchish qurilmalariga kelsak, hammasini oldindan aytish mumkin. Rossiya keng miqyosli terrorchilik harakatiga tayyorgarlik ko‘rayotgani aniq. Shuning uchun dastlab u Qrimda go‘yoki diversantlarning katta guruhini hibsga oladi. Keyin ‘Kreml ustidagi dronlarni’ namoyish etadi”, — dedi Podolyak.
Uning ta’kidlashicha, Ukraina faqat mudofaa urushi olib bormoqda va Rossiya hududidagi obyektlarga hujum qilmayapti. Podolyak bunday zarbalar “hech qanday harbiy muammoni hal qilmasligi”, balki Rossiyaga Ukraina tinch aholisiga hujumlarini oqlashga asos berishini ta’kidladi.
“Rossiyaning turli hududlarida sodir bo‘layotgan voqealarni qiziqish bilan kuzatmoqdamiz. Energetika obyektlari yoki Kreml hududida noma’lum dronlarning paydo bo‘lishi mahalliy qarshilik kuchlarining ishlaridan dalolat beradi xolos. Hammaga ma’lumki, dronlarni istalgan harbiy do‘kondan sotib olish mumkin”, — dedi maslahatchi.
Putin qarorgohiga hujum
Ukraina 3-mayga o‘tar kechasi Rossiya prezidentining qarorgohiga dronlar bilan zarba berishga uringani haqida xabar berildi. Ikkita dron Kremlni nishonga olishga qaratilgani, harbiylar va maxsus xizmatlarning o‘z vaqtida ko‘rgan harakatlari natijasida qurilmalar ishdan chiqarilgani ta’kidlandi.
Hujum oqibatida Putin jabrlanmaganini ma’lum qilindi, Rossiya prezidenti hodisa paytida Kremlda bo‘lmagan. Holat yuzasidan Moskvada 3-maydan boshlab dronlar uchirish taqiqlandi, 9-may paradi o‘tkazilishi rejasi esa davom etadi.
Ukraina prezidenti matbuot kotibi munosabati
Zelenskiyning matbuot kotibi Ukrainaning Kremldagi hujumga aloqadorligi haqidagi ayblovlarni rad etdi.
“Bizda Kremlga tungi hujumlar haqida hech qanday ma’lumot yo‘q. Ammo prezident Zelenskiy bir necha bor ta’kidlaganidek, Ukraina barcha mavjud kuch va vositalarni o‘z hududlarini ozod qilishga, boshqalarga hujum qilmaslikka yo‘naltiradi.
Terakt bu Dnepr va Umandagi kirish yo‘llari yoki Kramatorskdagi temiryo‘l vokzalidagi raketa otishmasi va boshqa ko‘plab fojialar oqibatida vayron bo‘lgan uylardir”, — deydi Ukraina prezidenti matbuot kotibi.
Izoh (0)