Adliya vazirligining Toshkent viloyati boshqarmasi boshlig‘i Abdumutalib Dadajonovni poraxo‘r deb atashi ortidan 2023-yilning 3-fevral kuni qamoqqa olingan Adliya vazirligi sobiq xodimi Husan Ravshanov ayni kunga qadar ham qamoqda ushlab turilgani, uning ishiga doir tergov xulosasi sudga yuborilmagani aytilmoqda. Bu haqda uning turmush o‘rtog‘i Sevara Ravshanova bosh prokuror Nig‘matilla Yo‘ldoshevning sayyor qabulida maʼlum qildi.
“Turmush o‘rtog‘im 2023-yilning 3-fevral kuni 139-modda (tuhmat) bilan ayblandi. Keyin 237-modda (yolg‘on xabar berish)ni qo‘shib, erimni qamoqqa olishdi. Shundan beri turmush o‘rtog‘im qamoqda. Tergov 2023-yilning 15-aprel kuni 139-modda bilan tugatilgan. 237-modda bo‘yicha aybi yo‘qligi tasdiqlandi va bu modda olib tashlandi. Shunga qaramasdan, erim haligacha qamoqda saqlanmoqda. Bu ish bo‘yicha tergov xulosasi berilgan, tergov yakun bo‘lgan. Lekin erim haligacha qo‘yib yuborilmayapti. Ish sudga oshmayapti”, — deydi muammo yuzasidan Bosh prokurorga shikoyat qilgan Sevara Ravshanova.
“Kun.uz” nashrining bu haqda avvalroq yozilgan xabarida taʼkidlanishicha, 2022-yil 3-may kuni ham “Sanjar Karimov” nomli akkaunt egasi Facebook’da Abdumutalib Dadajonovni og‘ir jinoyat, yaʼni takroran pora olishda ayblagan. Tergov bu ayblovlarni tuhmat deb hisoblagan.
“Olib borilgan tergov harakatlari davomida Adliya vazirligining Jamoatchilik bilan aloqalar bo‘limi bosh maslahatchisi Husan Ravshanovning xizmat xonasidagi foydalanuvida bo‘lgan kompyuterda yuqoridagi holatlarga aloqador mazmundagi fayllar borligi aniqlangan. 3-fevral kuni Ravshanov Jinoyat kodeksining 139-moddasi (tuhmat) 3-qismi ‘a’ bandida ko‘rsatilgan jinoyatni sodir etganlikda gumon qilinuvchi tariqasida tergovga jalb qilinib, Jinoyat protsessual kodeksining 227-moddasi tartibida ushlangan. Tergov Husan Ravshanovni ‘Sanjar Karimov’ nomli akkauntning egasi deb hisoblayapti. Uning harakatlari Jinoyat kodeksining 237-moddasi (yolg‘on xabar berish) 2-qismi ‘g’ bandi bilan qo‘shimcha malakalangan”, — deyiladi nashr xabarida.
Adliya vazirligi esa “Sobiq xodim X.R. hamkasblari shaʼni va qadr-qimmatini kamsituvchi maʼlumotlarni ijtimoiy tarmoqlarda tarqatib kelgani aniqlanib, materiallar tegishli huquqni muhofaza qilish idoralariga yuborilgan. Hozirda unga nisbatan tergov harakatlari olib borilmoqda”, deya bayonot bergandi.
Murojaatchining tushuntirishicha, uning turmush o‘rtog‘i rahbaridan maʼlumotlar olgan va uni tartibga solib, boshlig‘ining Telegram raqamiga tashlab bergan.
“Turmush o‘rtog‘im Adliya vazirligida Jamoatchilik bilan aloqalar bo‘limining bosh maslahatchisi bo‘lib ishlagan. Ularga boshlig‘i qanaqadir maʼlumotlarni tashlab, detallarni bir-biriga moslab, chiroyli qilib, yozib ber va menga tashla, degan. Erim shu maʼlumotlarni yozib, tashlab bergan, xolos. Turmush o‘rtog‘imning ishi buyurtma”, — deydi u.
Sevara Ravshanova Bosh prokuror qabulida shuningdek, mazkur muammo yuzasidan O‘zbekiston prezidentiga ham murojaat qilib, shaxsan bosh prokuror qabulini so‘raganini, Ichki ishlar xodimlari va prokuratura masʼullari orasida sarson bo‘lganini aytib, adolat so‘radi.
“Mayli, erimning aybi bo‘lsa, sudga chiqarishsin. Masalani sud ko‘rib chiqsin. Ammo nega tergovni yakunlasa-da, ishni sudga oshirmay hali-hamon ushlab turishgani noaniq”, — deydi qamoqdaligi aytilayotgan sobiq vazirlik vakilining xotini.
Bosh prokuror Nig‘matilla Yo‘ldoshev murojaatchi daʼvosini qanoatlantirishga urinar ekan, shu joyning o‘zida masʼullarga qo‘ng‘iroq qilib, tergovi yakunlangan ish nega haligacha sudga chiqmaganiga aniqlik kiritdi.
Bosh prokuror telefonda gaplashgan masʼulning maʼlumot berishicha, mazkur ish bo‘yicha tergov xulosasi o‘tgan juma, 2023-yilning 28-aprel kuni sudga yuborilgan. Bosh prokurorning bu gapiga ishonmagan murojaatchilarga javob bergan Nig‘matilla Yo‘ldoshev “Men bosh prokurorman, sizni aldamayman-ku, ishoning deb oldingizda telefonda gaplashdim”, — dedi.
Izoh (0)