Адлия вазирлигининг Тошкент вилояти бошқармаси бошлиғи Абдумуталиб Дадажоновни порахўр деб аташи ортидан 2023 йилнинг 3 февраль куни қамоққа олинган Адлия вазирлиги собиқ ходими Ҳусан Равшанов айни кунга қадар ҳам қамоқда ушлаб турилгани, унинг ишига доир тергов хулосаси судга юборилмагани айтилмоқда. Бу ҳақда унинг турмуш ўртоғи Севара Равшанова бош прокурор Ниғматилла Йўлдошевнинг сайёр қабулида маълум қилди.
“Турмуш ўртоғим 2023 йилнинг 3 февраль куни 139-модда (туҳмат) билан айбланди. Кейин 237-модда (ёлғон хабар бериш)ни қўшиб, эримни қамоққа олишди. Шундан бери турмуш ўртоғим қамоқда. Тергов 2023 йилнинг 15 апрель куни 139-модда билан тугатилган. 237-модда бўйича айби йўқлиги тасдиқланди ва бу модда олиб ташланди. Шунга қарамасдан, эрим ҳалигача қамоқда сақланмоқда. Бу иш бўйича тергов хулосаси берилган, тергов якун бўлган. Лекин эрим ҳалигача қўйиб юборилмаяпти. Иш судга ошмаяпти”, — дейди муаммо юзасидан Бош прокурорга шикоят қилган Севара Равшанова.
“Кун.уз” нашрининг бу ҳақда аввалроқ ёзилган хабарида таъкидланишича, 2022 йил 3 май куни ҳам “Санжар Каримов” номли аккаунт эгаси Facebook’да Абдумуталиб Дадажоновни оғир жиноят, яъни такроран пора олишда айблаган. Тергов бу айбловларни туҳмат деб ҳисоблаган.
“Олиб борилган тергов ҳаракатлари давомида Адлия вазирлигининг Жамоатчилик билан алоқалар бўлими бош маслаҳатчиси Ҳусан Равшановнинг хизмат хонасидаги фойдаланувида бўлган компьютерда юқоридаги ҳолатларга алоқадор мазмундаги файллар борлиги аниқланган. 3 февраль куни Равшанов Жиноят кодексининг 139-моддаси (туҳмат) 3-қисми ‘а’ бандида кўрсатилган жиноятни содир этганликда гумон қилинувчи тариқасида терговга жалб қилиниб, Жиноят процессуал кодексининг 227-моддаси тартибида ушланган. Тергов Ҳусан Равшановни ‘Санжар Каримов’ номли аккаунтнинг эгаси деб ҳисоблаяпти. Унинг ҳаракатлари Жиноят кодексининг 237-моддаси (ёлғон хабар бериш) 2-қисми ‘г’ банди билан қўшимча малакаланган”, — дейилади нашр хабарида.
Адлия вазирлиги эса “Собиқ ходим Х.Р. ҳамкасблари шаъни ва қадр-қимматини камситувчи маълумотларни ижтимоий тармоқларда тарқатиб келгани аниқланиб, материаллар тегишли ҳуқуқни муҳофаза қилиш идораларига юборилган. Ҳозирда унга нисбатан тергов ҳаракатлари олиб борилмоқда”, дея баёнот берганди.
Мурожаатчининг тушунтиришича, унинг турмуш ўртоғи раҳбаридан маълумотлар олган ва уни тартибга солиб, бошлиғининг Telegram рақамига ташлаб берган.
“Турмуш ўртоғим Адлия вазирлигида Жамоатчилик билан алоқалар бўлимининг бош маслаҳатчиси бўлиб ишлаган. Уларга бошлиғи қанақадир маълумотларни ташлаб, деталларни бир-бирига мослаб, чиройли қилиб, ёзиб бер ва менга ташла, деган. Эрим шу маълумотларни ёзиб, ташлаб берган, холос. Турмуш ўртоғимнинг иши буюртма”, — дейди у.
Севара Равшанова Бош прокурор қабулида шунингдек, мазкур муаммо юзасидан Ўзбекистон президентига ҳам мурожаат қилиб, шахсан бош прокурор қабулини сўраганини, Ички ишлар ходимлари ва прокуратура масъуллари орасида сарсон бўлганини айтиб, адолат сўради.
“Майли, эримнинг айби бўлса, судга чиқаришсин. Масалани суд кўриб чиқсин. Аммо нега терговни якунласа-да, ишни судга оширмай ҳали-ҳамон ушлаб туришгани ноаниқ”, — дейди қамоқдалиги айтилаётган собиқ вазирлик вакилининг хотини.
Бош прокурор Ниғматилла Йўлдошев мурожаатчи даъвосини қаноатлантиришга уринар экан, шу жойнинг ўзида масъулларга қўнғироқ қилиб, тергови якунланган иш нега ҳалигача судга чиқмаганига аниқлик киритди.
Бош прокурор телефонда гаплашган масъулнинг маълумот беришича, мазкур иш бўйича тергов хулосаси ўтган жума, 2023 йилнинг 28 апрель куни судга юборилган. Бош прокурорнинг бу гапига ишонмаган мурожаатчиларга жавоб берган Ниғматилла Йўлдошев “Мен бош прокурорман, сизни алдамайман-ку, ишонинг деб олдингизда телефонда гаплашдим”, — деди.
Изоҳ (0)