Бугун Қонунчилик палатаси депутатлари томонидан “Педагог мақоми тўғрисида”ги қонун лойиҳаси муҳокамаси бўлиб ўтади. Бу ҳақда Мактабгача ва мактаб таълими вазирлиги хабар берди.
Қайд этилишича, мазкур қонун лойиҳаси манфаатдор вазирлик ва идоралар, таълим ташкилотларида фаолият юритиб келаётган педагог ходимларнинг таклиф ва истаклари, шунингдек, жамоатчилик муҳокамаси доирасида келиб тушган таклифлар асосида қайта ишланиб, Вазирлар Маҳкамасига киритилган.
Лойиҳа Вазирлар Маҳкамаси Раёсати қарорига мувофиқ Олий Мажлиси Қонунчилик палатасига тақдим қилинган бўлиб, 2023 йилнинг 2 май куни Қонунчилик палатаси депутатлари томонидан қонун лойиҳаси муҳокамаси бўлиб ўтиши ҳамда биринчи ўқишда қабул қилиниши кутилмоқда.
Мазкур қонун лойиҳасида педагог ходимларнинг ҳуқуқ ва мажбуриятлари, уларни ижтимоий ҳимоя қилиш ҳамда уларнинг ҳуқуқлари, шаъни, қадр-қиммати ва ишчанлик обрўси давлат ҳимояси остида бўлиши тўғрисидаги нормалар белгиланмоқда.
Олий мажлис қонунчилик палатасининг навбатдаги мажлиси соат 15:00 да Қонунчилик палатасининг расмий веб-сайти, YouTube’даги канали орқали тўғридан тўғри эфирга узатилади.
Шавкат Мирзиёев 27 март куни педагог ходимларнинг хизмат вазифаларини бажаришига тўсқинлик қилганлик учун жавобгарликни кучайтиришни кўзда тутувчи қонунни имзолаган эди. Унга кўра, педагог ходимни меҳнатга бирон-бир шаклда маъмурий тарзда мажбурлаш учун маъмурий ва жиноий жавобгарликлар кучайтирилмоқда. Жумладан, умумий ҳолатда бирор шахсни мажбурий меҳнатга жалб этиш 30 миллион сўмгача (100 баравар) жаримага сабаб бўлса, эндиликда педагогларни мажбурий меҳнатга жалб қилиш 45 миллион сўмгача (150 баравар) жарима билан жазоланиши мумкин.
Изоҳ (0)