Республика тери-таносил клиник шифохонасида витилиго касаллиги ҳужайра кўчириш йўли билан даволанмоқда. Бу ҳақда Соғлиқни сақлаш вазирлиги ахборот хизмати хабар берди.
2022 йил марказга турли тери касалликлари билан 14 280 нафар бемор мурожаат қилиб, 1338 нафари стасионар шароитда даволанган. Шу даврда хорижий давлатлардан 257 нафар бемор мурожаат қилган бўлиб, бу кўрсаткич 2021 йилда 198 нафарни ташкил қилган.
2022 йилда соч тўкилиши диагностикаси учун трихоскопия, хол ва ўсимталарни текширишда дерматоскопия ва дерматоморфология усуллари такомиллаштирилган. Шунингдек, пуфакли касалликлар диагностикасида замонавий PIF ( тўғридан-тўғри иммунофлуорессент таҳлил) анализи ўзлаштирилмоқда. Бундан ташқари, иммуногистохимик лаборатория ташкил қилишга киришилган.
Жорий йилда муассасада витилиго, псориаз, аллергик ва бошқа касалликларда юқори натижа берувчи плазмоферез, фрацион ва эксимер лазер, озонотерапия ҳамда янги физиотерапия усуллари ўзлаштирилган. Дерматокосметология бўлимининг ташкил қилиниши даволашнинг замонавий усуллари ҳисобланган фрацион СО2 лазер, эксимер лазер, плазмоферез, озонатор, замонавий коагулятор ва бошқа замонавий технологиялардан фойдаланиш имконини бермоқда.
Клиника мутахассислари Туркия, Корея, Россия каби мамлакатларда малака ошириб, даволашнинг янги замонавий усулларини ўзлаштирмоқда. Жумладан, Туркиянинг етакчи тиббиёт муассасаларидан бўлган Neo Life клиникаси ҳамда Россиянинг Халқлар дўстлиги университети клиникаси билан имзоланган меморандум асосида клиника ходимлари ушбу муассасаларда ўқиб, малакасини ошириб қайтган. Ўз навбатида, Россиянинг Халқлар дўстлиги университети талабалари Республика тери-таносил касалликлари клиник шифохонасида тропик хасталикларни даволаш йўналиши бўйича таҳсил олмоқда.
Изоҳ (0)