Buxoro shahrida ikki ayolga do‘kon sotishni va’da qilib, ularning pullarini o‘zlashtirgan shaxs ushlandi. Bu haqda Buxoro viloyati IIB axborot xizmati xabar berdi.
Ma’lum qilinishicha, Buxoro shahar “J.Ikromiy” mahallasida yashovchi 30 yoshli Q.O. shaharning “Istiqlol” mahallasida yashovchi T.R. va “Guliston” mahallasida yashovchi 36 yoshli S.Sh. ismli ayollarga o‘zini aslida faoliyati tugatilgan “Shuxrat Baraka Ramzan” MCHJ rahbari “Mansurov Alisher” deb tanishtirgan. U ayollarga go‘yoki noturar joyni (savdo do‘koni) sotishni vaʼda qilib, soxta shartnoma hamda soxta pasport nusxasini taqdim qilish yo‘li bilan ularning ishonchiga kirgan. Shu orqali u jabrlanuvchilardan jami 50,8 ming AQSH dollarini aldov yo‘li bilan qo‘lga kiritishga erishgan.
Mazkur holat yuzasidan Jinoyat kodeksining 168-moddasi (firibgarlik) 4-qismi bilan jinoyat ishi qo‘zg‘atilib, hozirgi kunda dastlabki tergov harakatlari olib borilmoqda.
Kuni kecha Sirdaryo tumanida xonandani radio va ko‘rsatuvga olib chiqishini aytib, uni chuv tushirgan andijonlik yigit qo‘lga tushgandi. Shu kabi holat avvalroq Samarqandda sodir etilgan edi. Fuqaro samarqandlik san’atkorga qo‘ng‘iroq qilib, o‘zini Zo‘rTV telekanalida efirga uzatilib borilayotgan “Xafa bo‘lish yo‘q” ko‘rsatuvining boshlovchisi, deb tanishtirgan. Ushbu ko‘rsatuvga chiqarishni va’da qilib, 1,5 million so‘m pulni o‘tkazib olgan. Shundan so‘ng g‘oyib bo‘lgan. Ushbu jinoyatni Andijon viloyati Marhamat tumanida yashovchi yigit sodir etgani ma’lum bo‘lgan edi.
Izoh (0)