Бухоро шаҳрида икки аёлга дўкон сотишни ваъда қилиб, уларнинг пулларини ўзлаштирган шахс ушланди. Бу ҳақда Бухоро вилояти ИИБ ахборот хизмати хабар берди.
Маълум қилинишича, Бухоро шаҳар “Ж.Икромий” маҳалласида яшовчи 30 ёшли Қ.О. шаҳарнинг “Истиқлол” маҳалласида яшовчи Т.Р. ва “Гулистон” маҳалласида яшовчи 36 ёшли С.Ш. исмли аёлларга ўзини аслида фаолияти тугатилган “Шухрат Барака Рамзан” МЧЖ раҳбари “Мансуров Алишер” деб таништирган. У аёлларга гўёки нотурар жойни (савдо дўкони) сотишни ваъда қилиб, сохта шартнома ҳамда сохта паспорт нусхасини тақдим қилиш йўли билан уларнинг ишончига кирган. Шу орқали у жабрланувчилардан жами 50,8 минг АҚШ долларини алдов йўли билан қўлга киритишга эришган.
Мазкур ҳолат юзасидан Жиноят кодексининг 168-моддаси (фирибгарлик) 4-қисми билан жиноят иши қўзғатилиб, ҳозирги кунда дастлабки тергов ҳаракатлари олиб борилмоқда.
Куни кеча Сирдарё туманида хонандани радио ва кўрсатувга олиб чиқишини айтиб, уни чув туширган андижонлик йигит қўлга тушганди. Шу каби ҳолат аввалроқ Самарқандда содир этилган эди. Фуқаро самарқандлик санъаткорга қўнғироқ қилиб, ўзини Zo‘rTV телеканалида эфирга узатилиб борилаётган “Хафа бўлиш йўқ” кўрсатувининг бошловчиси, деб таништирган. Ушбу кўрсатувга чиқаришни ваъда қилиб, 1,5 миллион сўм пулни ўтказиб олган. Шундан сўнг ғойиб бўлган. Ушбу жиноятни Андижон вилояти Марҳамат туманида яшовчи йигит содир этгани маълум бўлган эди.
Изоҳ (0)