Samarqandda PUBG o‘yini akkauntini 7 ming dollarga sotishga kelishib, pullarni o‘zlashtirgan yigitga nisbatan jinoyat ishi qo‘zg‘atildi, deb xabar beradi Tergov departamenti.
Ma’lum qilinishicha, 2023-yil yanvar oyining oxirlarida Kattaqo‘rg‘on tumanida yashovchi 10-sinf o‘quvchisi (16 yosh) T.J. o‘ziga tegishli bo‘lgan Telegram orqali PUBG o‘yinining profilini 7 ming dollarga sotishi haqida reklama joylashtirgan. Shundan so‘ng, ushbu o‘yindagi profilini o‘ziga oldindan tanish bo‘lmagan Toshkent shahri Yakkasaroy tumanida yashovchi 14 yoshli I.S.ga sotishga kelishgan.
Undan jami 4 450 dollar miqdoridagi pullarni o‘ziga tegishli bo‘lgan plastik kartasiga o‘tkazib, I.S.ga esa PUBG’dagi profilini bermasdan, undan olgan pullarni mahalladoshi G‘.Sh. bilan o‘zlarining shaxsiy ehtiyojlari uchun ishlatib yuborgan.
IIV Kiberxavfsizlik markazi ma’lumotlariga ko‘ra, jabrlanuvchi otasining nomidagi bank kartasi orqali kelishilgan pullarni yigitning bank kartasiga bo‘lib-bo‘lib o‘tkazib bergan.
T.J. va G‘.Sh.dan bir dona iPhone telefoni va 10 million so‘mga yaqin pullarga xarid qilgan kiyim-kechaklari ashyoviy dalil sifatida hujjatlashtirib olingan.
Mazkur holat yuzasidan Kattaqo‘rg‘on tuman IIB huzuridagi Tergov bo‘linmasi tomonidan T.J.ga nisbatan Jinoyat kodeksning 168-moddasi 3-qismi “g” bandi (firibgarlik) bilan jinoyat ishi qo‘zg‘atilgan.
Hozirda tergov harakatlari olib borilmoqda. Qonunga muvofiq, T.J. va G‘.Sh. tomonidan sodir etilgan jinoiy harakatlar uchun 5 yildan 8 yilgacha ozodlikdan mahrum qilish jazosi nazarda tutilgan.
Izoh (0)