“Очиқ ахборот вақтида жойланмаса, ҳокимлик ахборот хизмати ишламаяпти дейилади”. Бюджет жараёнининг очиқлигини таъминлай олмаган ҳокимлик вакили муаммо сабабини очиқлади
Ҳисоб палатаси давлат идоралари томонидан ўз расмий веб-сайтларига бюджет жараёнининг очиқлигини таъминлайдиган ахборотнинг жойлаштирилиши бўйича 2022 йил хулосаларини тақдим этди. Маълум қилинишича, 2022 йил II чорак якунлари бўйича ушбу йўналишдаги ишлар ҳолати республиканинг 208 та туман ва шаҳар ҳокимликлари кесимида ўрганилган. Натижада 44 та ҳокимлик маълумотларни тўлиқ жойлаштиргани, 5 таси – тўлиқ жойлаштирмагани ва 159 таси – умуман жойлаштирмагани аниқланган. Қашқадарё вилоятининг Деҳқонобод тумани ҳокимлиги ахборот хизмати масъулларидан бири Қашқадарёдаги мавжуд туман ва шаҳар ҳокимликларининг барчаси бюджет жараёнининг очиқлигини таъминлай олмаган ҳокимликлар сифатида эътироф этилганини, бунинг ўзига хос сабаби борлигини очиқлади.
“Қашқадарё вилояти ҳокимлиги ҳузурида ‘Ахборот-коммуникация технологияларини ривожлантириш маркази’ ДУК ташкилоти бор. Номи жарангдор, вилоят ҳокимлиги ҳузурида. Шу ном остида улар барча қинғирликларини амалга ошириб, туман ва шаҳар ҳокимликларининг ахборот сиёсатига масъулларини алдаб, ‘қулоғига лағмон илиб келмоқда’. Муаммо не дерсиз. Гап шундаки, ўз вақтида ‘шахсан вилоят ҳокими топшириғи билан’, дея туман ҳокимликларининг сайтини яратиш учун камида ҳар бир туман ва шаҳар ҳокимликларидан 7 миллион сўмдан мажбурий-ихтиёрий тарзда шартнома қилдириб, пулини қуртдек санаб олган ташкилот сайт яратиш ишларида мажбуриятини тўлиқ бажармаган”, — дейилади ҳокимлик вакилининг бу ҳақдаги чиқишида.
Таъкидланишича, Қашқадарёдаги мавжуд туман ва шаҳар ҳокимликларининг аксариятида шу муаммо мавжуд.
“Боиси, аксарият ҳокимликлар сайтини вилоят ҳокимлиги ҳузуридаги ўша монопол ташкилот — компьютерлаштириш маркази қилгани сабаб, очиқ маълумотлар бўлими яратилмаган. Яратилганларида ҳам сайт ‘админкаси’да очиқ маълумотларни жойлаш имконияти йўқ. Дастурлаш ишлари якунланмаган. Лекин ташкилот сайт яратиш ишлари учун туман ва шаҳар ҳокимликларидан пулини аллақачон олиб бўлган. Муаммо юзасидан шахсан ўзим, Деҳқонобод тумани ҳокимлиги ахборот хизмати вакили сифатида ташкилот раҳбари Равшан Жонмуродовга лоф бўлса-да, юзлаб телефон қилиб, илтимос қилганман. (Аслида шартномага кўра, бу уларнинг мажбурияти) Аммо Равшан ака ҳар доим ‘Хўп, Аббосга айтаман, бугун қилиб беради, эртага қилиб беради’, дея давомли ёлғонлар билан қўйнимизни пуч ёнғоққа тўлдириб келмоқда.
Туман Молия бўлими ҳар чорак якунида ҳокимликнинг расмий сайтига жойланиши керак бўлган маълумотларни тақдим этади. Аммо уни сайтга жойлаш учун ҳокимлик ахборот хизмати вакилларида имконият йўқ. Сайт админкасида бунақа имконият яратилмаган. Очиқ ахборотлар ўз вақтида жойлаштирилмагач эса, ҳокимлик ахборот хизмати ишламаяпти деган хулосага келинади. Аслида бу ҳолат боксчини рингга чиқариб, рақибига қарши қўлқопсиз жанг қилдириш, аскарни жанг майдонига юбориб, қўлига қурол бермасликдек гап. Хўш, вилоят ҳокимлиги ҳузуридаги ташкилот шунақа ўйин қилгач, туман ва шаҳар ҳокимликлари ахборот хизматлари кимга шикоят қилсин? Бу ташкилотнинг ишини сўрайдиган, унинг мажбуриятларини ўз вақтида бажаришга чақирадиган эга борми? Ёки ташкилот раҳбари шахсан вилоят ҳокими топшириғи билан дея, кўпчиликни алдаб юраверадими?”, — дейилади бу ҳақдаги мақолада.
