O‘zbekistonda xizmat ko‘rsatgan artist Hosila Rahimova bu yil 48 yoshni qarshiladi. Otasining “o‘g‘li” bo‘lgan, bolalikdan ot choptirib, kurash tushgan Hosila Rahimovaning ijodi ham jo‘shqin. Keling, uning hayot va ijodi bilan bog‘liq ko‘pchilik bilmaydigan ma’lumotlarni oshkor etamiz.
“Meni Hosila emas, Xolmat deyishgan”
Hosila Rahimova shifokorlar oilasida dunyoga kelgan. Uning otasi Ibrohim hoji Denovning eng mashhur shifokorlaridan biri bo‘lgan. U ketma-ket uch qiz farzandli bo‘lganidan keyin o‘g‘il farzandli bo‘lishni niyat qilib, kenja qiziga shartli ravishda Xolmat deb ism qo‘ygan. Mahallada bu ism bilan tanilgan kurashchi, chavondoz biz bilan xonanda Hosila Rahimova edi.
— Dadam rahmatli qiz farzand tug‘ilavergach, irim qilib meni Xolmat deb chaqirgan ekan. Esimni tanigan paytlarimda sochimni kalta qilib, o‘g‘il bolalardek oldirishardi. Ko‘rinishimdan tortib, fe’l-atvorimgacha o‘g‘il bolalarga xos bo‘lgan. Ot choptirish, kurash tushish — eng sevimli mashg‘ulotim bo‘lgan. Hatto uzoqroq qarindoshlarimiz mehmonga kelishsa, dadam “O‘g‘lim bilan kurash tushasanmi?” deb ularning farzandlariga aytardi. Kurashda g‘olib bo‘lsam, u bolaning otasi “Qiz bolaga yutqazding” deb jig‘ibiyroni chiqardi. Oilamizda to‘rt qizdan keyin ikki o‘g‘il farzand dunyoga kelgan. Ukalarim katta bo‘lguniga qadar o‘g‘il bola qilishi kerak bo‘lgan ishlar mening zimmamda edi. Dadamning katta bayir oti bo‘lardi. Uni qirga olib borish, sug‘orish mening vazifam edi. Opalarim hayiqardi, men esa o‘g‘il bolalarga bo‘sh kelmay otni choptirardim, — deydi xonanda Hosila Rahimova.
“Urushqoq qiz bo‘lganman”
Hozirgi kunda ijodkor piarlardan, urush-janjallardan xoli bo‘lishni afzal ko‘radi. Ammo u bolaligida urushqoq bo‘lgani va qizlar bilan til topisholmaganini kulib eslaydi.
— Insonning fe’l-atvori o‘zgarar ekan. Bolalikdagi fe’limning ayrim jihatlari saqlanib qolgan, ammo urushqoqligim yo‘qolgan. Lapashang bolalarni yomon ko‘rardim. “O‘g‘il bola degani shaxdam bo‘lishi kerak”, deb mahalla bolalariga ham kun bermasdim. Denov tumanidagi 15-maktab mahallamizdan biroz narida edi. Biror marta papkamni o‘zim ko‘tarib kelganimni eslolmayman. O‘g‘il bolalarga papkamni ko‘tartirib, o‘zim yayrab uyga qaytardim, — deydi Hosila Rahimova.
“Uyda hamshiralik qilardik”
Xonanda oiladagi muhit sabab bolalikdan tibbiyotga mehr qo‘ygan. U hozir ham dori-darmonlardan foydalanishni yaxshi biladi.
— U paytlarda shifokorlar ko‘p martalik shprislardan foydalanishardi. Dadam uyda ham bemorlarni qabul qilgani uchun E’tibor opam bilan shprislarni qaynatardik. Dorilarni shprislarga tortib, dadamga yordamlashardik. Shuning uchun oilamizdagi qizlarning bari ozmi-ko‘pmi tibbiyotdan xabardor. Ayrim muolajalarni qilish ham qo‘limizdan keladi, — deydi xonanda Hosila Rahimova.
“Dadamdan hamisha minnatdormiz”
Hosila Rahimova bolalikdan san’atga qiziqqan, bunga qaysidir ma’noda otasi ham sababchi bo‘lgan. Chunki otasi rahmatli Denovning eng obro‘li insonlaridan biri bo‘lgan. Respublikaning qaysi hududidan bo‘lmasin san’atkorlar Surxondaryoga gostrolga borishsa albatta, Ibrohim hoji ularni uyiga taklif qilar va quyuq dasturxon yozardi.
— Juda ko‘p san’atkorlar ota uyimizda mehmon bo‘lishgan. Dadam rahmatli haqiqatan ham san’atsevar inson edi. Shu bois san’atga bo‘lgan qiziqishimni so‘ndirmagan. Maktabda o‘qish bilan birga Denov tumanidagi Yunus Rajabiy nomli musiqa maktabida ham o‘qishimga ruhsat bergan. U yerda rubob chalishni o‘rganganman. Dadam bir gapni ko‘p qaytarardi. “Kasb-hunar va turmush o‘rtoq insonning bir umrlik hamrohi bo‘ladi. Uni tanlashda adashmaslik kerak”, derdi. Shu bois birorta farzandiga majburan kasb tanlatmagan.
E’tibor opam jismoniy tarbiya institutida o‘qishini aytganida o‘zi imtihonlarga olib kelgandi. Agar uning o‘rnida boshqa ota bo‘lsa, “Qiz bolaga jismoniy tarbiyada nima bor?” deb shashtini so‘ndirgan bo‘lardi. Opam Toshkentga o‘qishga kirgan yili poytaxt markazidan kvartira sotib olgan. Hammamiz kam-ko‘stsiz va qiyinchiliksiz ulg‘ayganmiz. Buning uchun dadamdan hamisha minnatdormiz, — deydi xonanda.
“Ikki farzandli bo‘lgach, institutda o‘qiganman”
Hosila Rahimova tengdoshlariga nisbatan ancha kech san’at oliygohida tahsil olgan. Buning sababi otasi unga jiddiy shart qo‘ygan.
— Dadam rahmatli san’atkor bo‘lishimga qarshi bo‘lmagan. Ammo undan avval turmushga chiqib, farzandli bo‘lishimni istagan. “Dada, turmushga chiqqanimdan keyin institutda o‘qitishmaydi”, deganimda “Kuyovni o‘zim ko‘ndiraman”, deb va’da bergandi. To‘yga rozilik berganda “Qizim poytaxtda o‘qishni istaydi, agar uning ijodiga qarshi bo‘lmasang, to‘yga roziman”, degan. Shundan so‘ng turmushga chiqqanman va ketma-ket ikki qiz farzandli bo‘lganman. Shundan keyin ota-onam va qaynonamning roziligi bilan Toshkentga ko‘chib kelganmiz, — deydi xonanda.
“Qizlarimni sog‘inib, ko‘zimga uyqu ilinmasdi”
U 1998-yili sobiq Toshkent davlat madaniyat institutining Xalq musiqasi bo‘limiga o‘qishga kirgan. Ammo ikki nafar yosh bola bilan o‘qish oson kechmagan.
— Qizlarim ketma-ket tug‘ilgani uchun xuddi egizaklarni katta qilgandek bo‘lganman. Biri yig‘lasa, ikkinchisi ham sherik bo‘lardi. Kechasi bilan injiqlanadi, ertalab esa o‘qishga borishim kerak edi. Asabbuzarlikdan qiynalib ketganimda onam Toshkentga kelib, “Qizlarni o‘zimga ber, bunaqada ishingda unum bo‘lmaydi”, degan. Ana shundan keyin ishim ancha osonlashib, talabalik gashtini his qilganman. Ammo qizlarimni shunchalik sog‘inardimki, tasvirlab berolmayman. Ularimni sog‘inib, ko‘zimga uyqu ilinmasdi, — deydi xonanda.
“Opam menga prodyuserlik qilgan”
2001-yili institutni tamomlagan ijodkor yakkaxon ijodini boshlaydi. Avvaliga estrada qo‘shiqlarini, undan keyin maqom qo‘shiqlarini ijro etadi. Ammo natijalaridan qoniqmaydi.
— U paytlarda prodyuser nima ekanligini ham bilmasdim. Bir kuni dadamga yig‘lab, yangi qo‘shiqlar yaratishim kerakligi haqida aytdim. Shunda dadam rahmatli Shahlo opamga “Shunga yordam ber, bir o‘zini yolg‘izlatib qo‘yma”, deb tayinlagan. Hozir o‘ylab qarasam, Shahlo opam o‘shanda prodyuserlik vazifasini zimmasiga olgan ekan. Bastakor Rustam Mahmudovga borib, “Qancha xarajati bo‘lsa, men tayyorman, singlimga yaxshi qo‘shiqlar yozib bering”, degan. 2003-yil “Turkiston”, 2004-yilda esa “Xalqlar do‘stligi” san’at saroyida konsert berganman. Konsertlarimdan tortib, kliplarimgacha opam moliyalashtirardi, — deydi xonanda Hosila Rahimova.
Olti nabiraning buvisiga o‘xshamaydigan Hosila
Keyingi vaqtlarda Hosila Rahimovaning tashqi ko‘rinishi ancha o‘zgargan. Qomatidagi jiddiy o‘zgarish unga yanada go‘zallik baxsh etgan. Avvalgi kliplarida ot chopib, kurash tushgan xonandadan asar ham yo‘q. Hozirgi Hosila Rahimova go‘zal va noziktabiat ayolga aylangan.
Xonandaning ikki qiz va bir o‘g‘li bor. U qizlarini turmushga bergan va olti nafar nabiraning buvisi hisoblanadi. Katta kuyovi xonanda Bahriddin Zuhriddinov bo‘ladi.
Izoh (0)