Buyuk Britaniyada “Uzuklar hukmdori” filmidagi Gendalf kabi kiyingan talaba, tasodifan shu obrazni gavdalantirgan Makkelen bilan uchrashib qoldi (video)

Buyuk Britaniyada talaba tug‘ilgan kunida “Uzuklar hukmdori” filmidagi Gendalf qiyofasida kiyinib, ko‘chada tasodifan film trilogiyasida Gendalf rolini o‘ynagan aktyor Ien Makkellenni uchratib qoldi.

22 yoshli Ben Koyls Gendalf obrazida kiyinib, do‘stlari bilan Bristol bariga borgan.

“Biz oxirgi pabda edik va barga ketayotganimizda, ortimizdan kimdir haqiqiy Gendalf bizning Gendalfimiz bilan uchrashmoqchi ekanini aytib, chaqirdi. Avvaliga kimdir hazillashyapti deb o‘yladim”, — deydi Benning do‘sti Feliks Spenser.

“Buni anglab olishim uchun biroz vaqt kerak bo‘ldi, keyin esa bu aslida Ien Makkellen ekanini ko‘rdim. Men Makkelen bilan biroz suhbatlashdim, u juda muloyim va mehribon edi. U insonlar o‘ziga juda yoqadigan film qahramoni sifatida kiyinishini ko‘rib xursand bo‘ldi”, — deydi Spenser.

Benning do‘sti uchrashuv videosini TikTok’ga yukladi va video tezda millionlab ko‘rilishlarga ega bo‘ldi. Video ijtimoiy tarmoq va ommaviy axborot vositalarida tarqaldi.